Плюновением Своим иногда давый свет видети слепорожденному, по пресветлом лице Твоем от иудей прежде распятия мерзким плюновением обезчестен, честнейший всех ангельских чинов, Господи Иисусе Христе, Сыне Божий, слава Тебе, слава Тебе; укрепи мя во омерзение всегдашнее, и во оплевание всех вражиих сетей, искушений же и вожделений плотских, молюся Ти!

Егда Тя людие лютии иудейстии на Голгофу приведоша, Крест на землю положиша, дабы на нем распяли Тя, "простирающаго небо яко кожу" (Пс. 103, 2), абие Сам непреложне положитися на Кресте восхотел еси; но зверообразнии мучители единодушно устремившеся на Тя, повергоша Тя на Крест, и столь немилостивно ко Кресту руце и нозе Твои пресвятии святым гвоздием пригвоздиша, яко вся жилы и составы Твои терзахуся. И тогда сбыстся реченное о Тебе пророком Давидом: "Пересчитали все кости мои" (Пс. 21, 18); болезнь же оная лютейшая, и тягчайшая Тебе бяше паче всех страданий Твоих, еюже души моея всю болезнь исцели, молюся Ти и вопию: слава Тебе, слава Тебе, Господи Иисусе Христе, Сыне Божий. Преславных ради, пречистых и животворящих страданий Твоих спаси мя, многомилостиве и человеколюбче Владыко!

Прокаженныя очищаяй, Пречисте, краснейший паче всех сынов человеческих добротою (см. Пс. 44, 3), Сам аки прокажен был еси от мерзкаго осквернения плевотинами, яже на Кресте протяжен, лежа на земли, по различных Тела Божественнаго частех приял еси. Слава Тебе, Господи Иисусе Христе, Боже мой, слава Тебе! Душу мою прокаженную от несказанных скверн греховных очисти и спаси мя, молюся Ти.

Воздыхания сердечная прежде Крестной смерти испустивый, слезныя капли при животворящих Твоих Страстех и кровныя капли излиявый, излей на мя милосердие Твое и даруй ми сердечные о гресех моих воздыхания; подаждь грехом очистительныя слезы, паче слезами и Кровию Твоею пречистою очисти и омый душу мою, да пою: слава Тебе, Господи Иисусе Христе, Боже мой, вся сия мене ради претерпевый, слава Тебе!

На Кресте весь наг воздвижен, точию пречистыя чресла Своя имый покровенна покрывалом, между двема разбойникома обешенный, желчи и оцта вкусивый, Пресладкий мой Иисусе, слава Тебе, слава Тебе! От горести греха и пакостей вражиих сохрани мя, молюся Ти.

Слава Тебе, Господи Иисусе Христе, Боже мой, слава Тебе! Вся, елика душевными и телесными чувствы согреших, прости ми, окаянному, честнаго ради страдания Твоего спасительнаго.

Ты бо еси Истина, и поистине всем спастися хощеши, и Тебе от всех подобает слава, честь, хвала и поклонение ныне и присно, и во веки веков. Аминь.

Повествователи, историки, свидетели и учители, писатели церковные о страданиях Господних следующие: св. Афанасий Великий, св. Евсевий Самосатский, св. Иоанн Златоустый, св. Киприан, св. Епифаний Кипрский, св. Амвросий Медиоланский, св. Феодорит, св. Иероним, св. Иоанн Дамаскин, св. Леонтий, Папа Римский; св. Иоанн Лествичник; св. Исидор Пелусиот и прочие святые.

Составлено это молитвенное размышление о страданиях Господних старанием и трудами преосвященного Димитрия, митрополита Ростовского и Ярославского, в лето от воплощения Бога Слова 1702.

15. Целование членов, или ран, Господа нашего Иисуса Христа во всякий день

Радуйся, ужасная всем державам пресвятая главо Господа нашего Иисуса Христа, нас ради тернием увенчанная и тростью избитая.

Радуйся, прекраснейшее лице Господа нашего Иисуса Христа, нас ради оплеванное и биенное.

Радуйтеся, премилостивейшие очи Спасителя нашего Иисуса Христа, нас ради слезами облиянныя.

Радуйтеся, уста и гортани Господа нашего Иисуса Христа, нас ради желчию и оцтом напоенныя.