Страница 2 из 3
еяже и вы причястникы есте, приносящеи вы, подобне оному проклятому, опреснокы, и тойже оному анафеме подлежите и вы, акы тоже ему и не хотяще и вы проповедующе опресночным приношением вашим.
Оставлю считати прочяа вашя преступлениа многа и странны уставы, еликы сами собою замыслили, кроме всякого и закона церковнаго и апостольскаго преданиа: еда не темже еретическым епитимиам себе повинных сотворили? Толика убо и толь велиа беззаконнующим вам, како мы сообщимся с вами, дондеже со рвением пребываете в них неотступно? Несть праведно ни на пользю душевну нам сицевое друг ко другу сообщение.
И не глаголи нам многокозненным хытрословием, яко тоже крещение, таже вера русаком и латыном. Слыши же внятно и разумей прямо: еретикы, иже от Навата презвитера бывша римскаго, наватиане нарицаеми, ниже о крещении, ниже о таинстве православныя веры, ниже о ином коем законе церковнем, но зане точию дарованное от человеколюбия Спаса Христа грешником покаяние отрицаху и не приимаху на покаяние обращающихся, иже в гонении Христа отвергошяся, за то едино отриновени бышя от всего Собора православных и прокляти были.
Павел же божественый апостол, к Галатом пишà, вопиет не обинуяся: аще кто благовествует вам паче, еже приасте от нас, аще и ангел есть с небесе благовествуя вам, да будет проклят.
Тойже тем же объявительне свидетелствует, глаголя: аще обрезаетеся, Христос ничимъже пользует вас. Аще и вся праве действовахуся у них и крещение и исповедание християнскыя веры и весь церковный устав и чин, но понеже приашя, еже по Моисеову преданию обрезание и некых иных обычаев иудейскых, отринул их апостол, рекъ: упразднистеся от Христа, елицы в законе оправдаетеся, благодати отпадосте.
Разумееши ли, о Николае, коль ест сильно еже богопроповедника о правей вере прилежание? Своя ученикы отринул, елма слышал их малым чим уклонившихъся от евангельскыя истины и свободы, рекъ: упразднистеся от Христа, елицы в законе оправдаетеся. Сие же: упразднистеся, что ино сказует, точию отпадосте благодати Христовы и сыновления. Ты же неточию священный символ православныя веры разтлив, но еще и иных многых апостольскых и церковных преданий преступая, влечеши нас к соединению с вами многокознеными хитрословии и различными пестрословии.
Тому же божественому апостолу Павлу завещавающу нам крепце отлучатися неточию от чюжая учащих, но от всякаго брата именуемаго, по апостольскому же учению и преданию не ходящаго, с таковым, рече, ни ясти. Или не Павел сиа пишет Коринфяном глаголя: ныне же писал вам не смешатися; аще некый брат именуем будет блудник, или лихоимец, или идолослужитель, или пианица, или хыщник, с таковым ниже ясти [9]; и пакы: измете лукаваго от среды вас.
Сему светильнику мы грекы и руси иверяне и болгары и сербове и волохи и инии языцы, немало покаряющеся, и якоже дети беззлобиви послушающе, отлучяемся от вас латынех, по божественой ревности и желанию вечныя жизни, а не по гордости фарисейстей и кычению суетному, якоже ты, оклеветая нас, являешися сим многоплетенным и многокозненным списанием своим, в немъже и некыя обдержатся нелепотныя учителския твоя повести, непросвещенныя мысли изобретения.
Како бо нелепотно и отринуто и мерзко благочестивому слуху, еже глаголати сатаниньскым действом ослепленных бывших Луку и Клеопу божественых апостол, идущих во Еммаусъ? Откуду имаши сие приемъ? или кое богодохновенно толкование отеческое научило тя есть сему, яко сатаниньскым действом, а не Божественным строением, провосходящим всякого ума человечя, очеса их удержашеся, да не познают Iсуса, якоже и очи блаженныя Марии Магдалины видевша Его предстояща, и не познавши глаголаше к Нему, акы к вертоградарю: Господи, аще ты еси взял Его, рцы ми, где еси положил Его.
Еда мудръствуеши, Николае, яко и очеса ея сатана поразил слепотою? Оле твоего не наказаннаго ума, паче же хульнаго! Божественным смотрением, неведомым нам, удержашася очеса учеников, о Николае, а не по сатанинскому действу. Идеже бо Божие пришествие и беседа Владычня, о Николае, оттуду избеже и исчезе всяко действо сатанинско и кознь. Подобно сему твоему нелепотному толкованию и ино нечто повествуеши чюже и неведомо соборней и апостольстей святей Церкви.
Глаголеши бо, яко божественнии апостоли собравшеся изложишя устав и исповедание православныя веры, единому комуждо их чясть некую изрекшу, в котором же граде или стране, и когда ея изложишя, или кая богодохновенная книга сие предала вам, не изъяснил еси нам, убоявся всяко якоже мнитмися обличения, еже от благочестивых, нигдеже бо обретается писаное у нас правоверных таково.
Сие же и зело ведомо есть всем везде сущим правоверным, яко первый, иже во Святем Дусе собравшийся в Никеи священный Собор 318 богоносных отец на злочестиваго Ария, создана Бога Слова глаголющаго, изложишя устав православныя веры богословивше краткыми словесы велию тайну Всесвятыя и поклоняемыя Троиця и смотрение вочеловечения Бога Слова. О Святем же Дусе толико точию рекше: веруем и во Святый Дух.
И понеже по летех некых явися духоборный Македоний, хуля на Святый Дух, создан ѝ мыудръствуя, по нужи собрася вторый вселеньскый Собор 150 богоносных отец в Констянтине граде, при великом цари Ѳеодосии, приложил во священном символе еже о Святем Дусе богословие.
Третий же святый Собор иже во Ефесе, емуже бе начальник священный Кирил патриарх александрьскый, запечатле клятвами страшнейшими предизложенную веру бывшими преже его двоими вселенскыми Соборы, дабы никтоже к тому дерзнул претворити ни единое речение, ниже приложити что в предизложенный символ, ниже уложити у него [10]. Сице мы прочитаем в деяниих священных Собор, и сице держим и веруем и проповедуем, желающе наследницы быти со святыми седьмыми Соборы вечных благ и благословения, а не с вами, преступникы, вечныя клятвы и осужения.
А еже от тебе повествуемо, о Николае, ниже видехом написано отнюд в книзе которей православней, ниже слышахом сие от иного коего даже и до сего. Буди же тако якоже ты утвержаеши, яко святии апостоли преже святаго Собора никейскаго изложишя устав православныя веры, чесо ради ты, Николае, преступаеши безъума священное их о Святемь Дусе богословие, и не якоже они богословиша держиши è?
Они решя по твоей повести Варфоломеем апостоломъ: веруем и во Святый Дух, и далее сего не проидошя. Такоже после их священный никейскый Собор подобне им изложишя, ничтоже приложше; таже третий Собор святых отец приложишя во священном символе совершенное богословие, еже о Святем Дусе, прирекше: и в Святыи Дух Господень животворящ, от Отца исходящь, якоже сам единородный Сын Божий Iсус Христос, богословил гласом святаго Иоанна евангелиста.
Ты же, акы и самех святых апостол, и священных триех собор, и самого Единороднаго вышше вознесеся крылы таинственнаго богословия, дерзнул еси собою приложити к неблазненному их богословию глаголя: и в Духа Святаго от Отца и Сына исходящаго, и сице являешися лжущ сугубым лганием. Единым убо глаголя, яко имъже образом прият латынская Церковь от самех святых апостол, сице и соблюдает непретворен священный символ православныя веры, и се изобличен еси лжущ, приложила бо от себе еже и от Сына, преступивши апостольскых и отеческых завещаний и клятв, и бысть подвинна соборней анафеме.
Другым лжеши объявленне, два начала проповедуя присносущнаго и непостижимаго исхожения Святаго Духа, еже есть хульно. Аще бо два испущателя Духу Святому Отец и Сын, то убо и два начала Божеству Святаго Параклита, еже есть ложно и сопротивно евангельскым и отеческым таинственным богословием.
Един бо источник Божеству и Сына и Духа Святаго, Отец есть по изящному богодохновенному богословцу Ареопагитскому Дионисию и по всем вкупе святых отец. В сих убо изобличен лжущ, престани прочее досаждая православным людем рускым, глаголя не по разумию истины отлучити себе сообщения латынскаго, не по разумию, Николае, ниже по суетному рвению, но по послушанию глаголющаго богодохновеннаго богословца Иоанна, завещавающаго нам крепце и глаголющаго: всяк преступаяй и не пребываяй во учении Христове, Бога не имать, пребываяй во учении Христове сей и Отца и Сына имать.
Таже приводит глаголя: аще кто грядет к вам и учения сего не приносит, не приимайте его в дом, и радоватися ему не глаголите, глаголяй бо ему радоватися, сообещник есть делом его лукавым. Разумей, о Николае, силу евангельскыя сея речи, и сложи всяко прение суетно и упрямство; неточию бо просто еретика глаголет преступающаго и не пребывающаго во учении Христове, но и безбожника его яве именует.