Страница 11 из 25
Пощади ны, Господи Боже (трижды),
наипаче по благоутробию Своему, приносим Ти, Владыко, страшную сию и безкровную жертву, моляще да не по грехом нашим, ниже по беззаконием нашим воздаси нам, но по Твоему снисхождению и неизреченному Твоему человеколюбию презрев и изгладив еже о нас рукописание Тебе молящихся, подаси нам небесныя и вечныя Твоя дарования, ихже око не виде, и ухо не слыша, и на сердце человеческое не взыде, яже уготовал еси, Боже, любящим Тя Своея ради благости, и не ради грехов моих отринеши люди Твоя, человеколюбче Господи, да не возвращуся с ними смирен и посрамлен,
(И поет с сослужащими во глас 5): Яко людие Твои и церкви Твоя молятся вси.
Народ: (отвечает в тот же глас): Помилуй нас, Господи Боже, Отче Вседержителю.
(Повторяется трижды)
Предстоятель: Помилуй нас, Боже Вседержителю, помилуй нас Боже, Спасителю наш, помилуй нас Боже по велицей милости Твоей и ниспосли на ны и на предлежащия Святыя Дары сия Духа Твоего Всесвятаго, (молится, приклонив голову)
Господа Животворящего, сопрестольного Тебе, Богу и Отцу и единородному Твоему Сыну, соцарственного, единосущнаго же и совечнаго, глаголавшего законом и пророки и новым Твоим заветом, сошедшаго в виде голубине на Господа нашего Иисуса Христа во Иордане реце и пребывающаго на Нем, сошедшаго на святыя Твоя апостолы в виде огненных язык в горнице святаго и славнаго Сиона в день святыя Пятидесятницы, сего Духа Твоего Всесвятаго ниспосли, Владыко, на ны и на предлежащия Святыя Дары сия, (приподняв голову, воглашает)
да посетив святым и благим и славным Своим наитием, освятит и сотворит хлеб убо сей Тело святое Христово.
(благословляет Святой Хлеб X)
Народ: Аминь.
Предстоятель: И чашу сию Кровь Честную Христову. (благословляет Святую Чашу X)
Народ: Аминь.
Предстоятель: Да будет всем иже от них причащающимся во оставление грехов и жизнь вечную.
Народ: Аминь.
Предстоятель: (знаменует святой дискос и святую чашу вместе X)
Яко да будет всем, иже от них причащающимся, во оставление, во оставление грехов и в жизнь вечную, во очищение душам и телом, во плодоношение благих дел, во утверждение святей Твоей соборней и апостольстей Церкви, юже основана камени веры, яко и двери адовы не одолеют Ея, избави Ю от всех ересей и соблазнов и делающих беззаконие, сохраняя Ее даже до скончания века. (знаменует дискос X и чашу X отдельно).
Приносим Ти, Владыко, и о святех Твоих местех, ихже благословил еси богоявлением Христа Твоего и наитием Всесвятаго Твоего Духа, наипаче же о святем и славнем Сионе, матери всех церквей, и о еже по всей вселенней святей Твоей соборней и апостольстей Церкви, богатыя дары всесвятаго Твоего Духа и ныне подаждь ей, Владыко.
Народ: Подай, Господи. (на 6–й глас).
Предстоятель: Помяни, Господи, и иже в ней святыя отцы наши и братья наши, и епископы, иже во всей вселенней православно правящия слово Твоея истины.
Народ: Помяни, Господи, Боже наш. (после каждого прошения)
В первых помяни, Господи Боже наш, преподобнаго Отца нашего Святейшего Патриарха АЛЕКСИЯ, старость ему честную подаждь, многолетна его сохрани, пасуща люди Твоя во всяком благочестии и чистоте.
Помяни, Господи, еже зде и повсюду честное пресвитерство, еже во Христе диаконство, прочее всякое служение, весь церковный чин и еже во Христе братство наше и вся христолюбивыя люди.
Помяни, Господи, сопредстоящия нам пресвитеры, служащия во святый час сей пред святым Твоим жертвенником во еже приносити святую и безкровную Твою жертву и даждь им и нам слово во отверзение уст наших, во славу и похваление всесвятаго имени Твоего.
Помяни, Господи, зде начальствующия, учащия и учащиеся.
Помяни, Господи, по множеству милости Твоея, и мене смиренного, и грешнаго, и недостойнаго раба Твоего, и призри на мя милостию и щедротами, и избави и свободи от гонящих мя, Господи, Господи сил, и не вниди в суд с рабом Твоим, и понеже умножися во мне грех, да преизбыточествует Твоя благодать.
Помяни, Господи, и святый Твой жертвенник окружающия диаконы, подаждь им жительство непорочно, чисто служение их сохрани, и степеней высших сподоби.
Помяни, Господи, Богохранимую страну нашу Российскую, господина Президента, всю палату и воинство его, и еже с небесе помощь и победу. Коснися оружия, и защити, и возстани в помощь их, покори им вся враждебныя и варварския языки, утверди в православней вере. Устрой советы их вся, яко да мирное и тихое житие поживем во всяком благочестии и чистоте.
Помяни, Господи, Богохранимый град наш, и стольный град Москву, и всякий град и страну, и в православной вере и благочестии живущия в них, мир и безмятежие их.
Помяни, Господи, плавающих, путешествующих, странствующих христиан, и во узах и в темницех, и иже в пленении, и в заточении, и в рудах, и в муках, и в горьких работах сущих, отец и братий наших коегождо в дом его в мире возврати.
Помяни, Господи, в старости и немощи сущия, болящия и страждущия, и от духов нечистых стужаемыя, яко да от Тебе, Бога получат скорое исцеление и спасение.
Помяни, Господи, всякую душу христианскую, оскорбляемую и угнетаемую, милости и помощи от Тебе, Бога, требующую, и обращение заблудших.
Помяни, Господи, иже в девстве и благоговении и постничестве пребывающия, и иже в горах и в пещерах и пропастех земных подвизаюшихся всех преподобных, отец и братий наших, иже по различным местом, православныя собранныя, и иже зде собрание наше.
Помяни, Господи, труждающихся и служащих нам отцов же и братьев наших, ради имене Твоего святаго.
Помяни, Господи, всех во благое, всех помилуй, Владыко, всех нас примири, умири множество людей Твоих, в благоверии соблюди, истреби соблазны, упраздни брани, умири разделения церковная, ересей восстания скоро разруши, низпровержи гордыню язык, вознеси рог христиан православных, Твой мир и Твою любовь даруй нам, Боже, Спасителю наш, упование всех концев земли.
Помяни, Господи, благорастворение воздухов, дожди мирныя, росы благия, плодов изобилие, совершенное плодородие, и венец лета благости Твоея благослови, очи бо всех на Тя взирают, и Ты даеши пищу во благое время, отверзаеши Ты руку Твою, и исполняеши всяко животно благоволение.
Помяни, Господи, плодоносившия и плодоносящия во святых Божиих церквах и поминающия нищия, вдовицы, сиры, странники и вся нуждающияся и заповедавшия нам, недостойным еже поминати их в молитвах.
Еще помянути сподоби, Господи, и приношения сия принесшия в днешний день на святый Твой жертвенник, и нихже кийждо принесе, или в помышлении имать, и вмале Тебе прочтенныя.
Помяни, Господи, и живыя родители наша, и братию, и други, и сродники.
[(здесь же поминает Предстоятель живых, сколько и кого хочет по именам)]
Помяни, Господи, и ихже помянухом, православныя: воздаждь им вместо земных небесныя, вместо тленных нетленная, вместо временных вечная, по обетованию Христа Твоего, понеже живота и смерти область имаши.
Еще помянути сподоби, Владыко, и иже от века Тебе благоугодившия в род и род: святыя отцы, патриархи, пророки, апостолы, мученики, исповедники, учители, преподобныя, и всякий дух праведный в вере скончавшийся.
Помяни, Господи, архангельский глас глаголющий:
Радуйся, Благодатная, Господь с Тобою, благословенна Ты в женах и Благословен Плод чрева Твоего, яко Спаса родила еси душ наших.
Изрядно Пресвятую и Преблагословенную, Пречистую Владычицу нашу Богородицу и Приснодеву Марию.
(Диакон поминает усопших).
[хор поет «Достойно есть» и «О Тебе радуется»]
Святаго Иоанна славнаго пророка, предтечу и крестителя, святыя апостолы, святыя пророки и патриархи и праведныя, святыя мученики и исповедники.
[Святых апостол Петра и Павла, Андрея, Иакова и Иоанна, Филиппа, Варфоломея и Фому, Матфия, Иакова и Симона, Иуду, Матфея, Марка и Луку, евангелистов. Святых пророк, патриарх и праведных. Святаго Стефана перводиакона, первомученика, святых мученик и исповедник, иже за Христа Бога умучившиеся и исповедавших доброе исповедание, святых младенец, избиенных от Ирода царя.
Помяни, Господи, и святых мученик: Прокопия, Феодора, Кира, Иоанна и Георгия, Леонтия, Сергия и Вакха, Космы и Дамиана, Савиниана, Павла, Вавилу, Агафангела, Климента, Евстратия, и иже с ними мучившихся.
Помяни, Господи, и святых мученик сорок, и сорок два, и шестьдесят и три, тридесять и три, святых мироносиц жен, и святую первомученицу Феклу, и святых жен–мучениц: Татиану, Февронию, Анастасию, Евфимию, Софию, Варвару, Иулианию, Ирину, Елпидию, Епистимию, Агафию, Марию, Екатерину.