Страница 3 из 5
Аще же хто речет, яко святии апостоли и преподобнии отцы повелеша царем и князем и властелем в отмщение быти зло делающим, еже есть убийцам и прелюбодеем, татбу же и разбойничества и иная злая дела творящим, а не о еретицех и о отъступницех; и аще убо о убийцах и о прелюбодеех, и иже иная злая дела творящих, поведено бысть сице, множае паче о еретицех и о отъступницех подобает тако же быти.
Яко же свидетельствует божественое писание; глаголеть бо ся в божественых правилех, еже от градцких закон, о неверных и о еретицех сице: «Иже сподобившеися святаго крещения, и отступльше[з] православныя веры, к еретици бывше, или творяще елиньскыя жрътвы, конечней повинни суть муце. Аще жидовин дръзнет развратити християньскую веру, главней повинен есть казни.
Манихеи же, или ини еретици християне бывше, и потом начнут еретическая творити или мудръствовати мечем да посекаются, и иже таковыа сведающе, и не предающе сих князем, конечней муце повинни суть. Аще ли же хто воевода или воин, или соньмища на чялник, должни суть о сем пещися, егда хто еретическая творя или мудръствуя, и аще уведавше не предадять его, аще и правоверии сами суть, конечную муку подоимут».
Где суть глаголющей яко не подобает осужати ни еретика, ниже отступника? Се убо явьствено есть, яко не точию осужати подобаеть, но и казнем лютым предавати, и не точию еретики и отступники, но аще и правовернии будут сами, уведавше же еретики или отступники, и не предадят судиам, конечную муку подоимут.
Аще ли же хто речет: «Се есть градстии закони, а не апостольская, ниже отеческая писания», таковый да слышит преподобнаго отца нашего Никона в своих богодухновенных писаниих сице глаголюща о градских законех[в]: «Сего ради святый поклоняемый дух, въдохну в божественыя отца на святых соборех, и учиниша божественая правила, яже от святаго духа, изложиша божественыя законы и словеса святых отець и богоносных, и от уст же самого господа святыя его заповеди глаголаны быша, и обаче и от древних божественая правила со градскыми размешена быша законы же и завещании».
Сице номоканун книга сотворена бысть, сиречь закону правила. Множае паче божиим промыслом божественая правила, с заповедьми господними, и реченными святых отець, и с самеми паки градскыми законы разъмешена бывше, предреченная книга сотворися. Аще убо святии отцы, иже на вселеньскых и на поместных соборех бывшеи, и от святаго и животворящаго духа наставляеми, и учиниша божественая правила и законы и словеса святых отець, и яже от уст самаго господа святыя его заповеди, со всеми же сими и градстии законы сочеташа святии отци древний.
И хто убо дрьзнет сих отложити или похулити, яже от святаго духа и святых отець приата быша, и сочьтана со всем божественым писанием.
Подобно же тому и великий Афанасие глаголеть, яко сии суть еретичестии отроци, иже глаголють, яко не подобает судити творящих смертныя грехи. И аще бы тако было, яко же они утверьжают, не бы праведный Ное судил Хама ругателя раба быти братиам своим.
И Моисей же поклонившихся телцю три тысущи повеле мечем иссещи, и собравшаго дрова в суботу повеле камением побити его. И Исус Наввин Ахара крадбы ради со всем домом потреби. Финеес же блуда ради Замьврия погуби, и Самоил Агага царя пред господем уби. Илия же ложныя пророки, яко же свиниа в потоце, исъкла. Елисей же осуди Гиезию приятна ради имения, прокажена показа.
Данил же, осудив блудныя старца законом Моисеевым погуби. И святый апостол Петр, прием ключя царства небеснаго, Ананию со женою его утаившая от своего стяжания осудив, абие сотвори их издохнувша. И Павел Александра ковачя, Именея же и Филита предасть сатане, да накажются не хулити. Се убо вси праведнии судивше, не осуждени бывше, паче же избрани бывше, в духовную службу изъбрашася.
Сиа глаголет и учит великий Афанасие о творящих смертныя грехи: «Тяжчяйши же и страшнейши всех смертных грехов грех, еже вь ересь впасти, и Христа отврещись»; тако бо сказует той же божественый Афанасие и великий Иоан Златоустый и в своих писаниих: «Царьскими же суды и градскими законы обуздоваеться безумных человек воля, иже смертныа грехи творящих, и душу с телом губящих».
Тако бо глаголють и священная правила святых отець. Слышите цари и князи, и разумейте, яко от бога дана бысть дръжава вам, яко слуги божий есте; сего ради поставил есть вас пастыря и стража людем своим, да соблюдете стадо его от волков невредимо; вас бо бог в себя место избрал на земли, и на свой престол вознес посади, милость и живот положи у вас, и мечь вышняя божия десница вручи вам; вы же убо да не здержите истинну в неправде, и убойтеся серпа небеснаго, и не давайте воля зло творя щим человеком, и не напущайте на правоверный человеки, яко же псы бесныя, или яко аще кто мечь дасть человеку неистовящуся, и он не точию телеса, но и душа губит.
Что глаголеть, иже не токмо телеса губит? Се глаголеть о убийцах и иже разбойничества и обиды творящих, иже точию тело губят; а иже глаголеть: «Иже не точию тело губят, но и душу губят», се глаголеть о еретицех и о отъступницех: сии убо с телом и душу губят, еретическыми учении прельщающе православныя.
И что убо, аще они сотворят зло, на попустившаго душу приходит грех, еже есть на царя и на князя и на судия земскиа, аще власть дадут злочестивым человеком, о сем истязани будут от господа бога в страшный день втораго пришествия христова.
И сего ради царем и владетелем о сем попечение имети, яко да будут отмъстители Христу на еретики. Подобно же тому наказует и учит священный Златоуст, сице глаголя: «Еже убо по воли божии бываемо, аще и озлобити мнится, всех есть добрейши, а еще чрес волю божию и не угодное оному, аще и изрядно быти мнимое всех есть злейши и законопреступнейши. Аще убиет хто по воли Божией человеколюбия всякаго есть лучшии убийство оно.
Аще и пощадит хто, человеколюбьствуя чрес угодное оному, убийства всякого непреподобнейши будет то пощадение: не естество бо вещем, но божии судове добра и зла сия быти творят». Да навыкнеши, яко се истинно есть, послушай реченных. Пощади некогда чрес божественую волю Агага царя амаликова, Саул царь израилев, и за се пощадение приат от бога осужение, и не точию сам, но и все семя его.
Тако же царя асирийска Адера ем Ахав, паче угоднаго богови снабде, и со многою отпусти его честию, и пророка некоего посла бог ко Ахаву глаголя: «Тако глаголеть господь: яко отпустил еси ты мужа губителя от руки твоея, душа твоя вместо душа его, и людие твои вместо людей его». Подобно же сему пророк некий пришед рече ко искренему своему: «Словом господним бий мя», и не восхоте человек он бити его, и рече к нему: «Занеже не послуша гласа господня, се ты отидеши от мене, и поразит тя лев», и отиде от него, и обрет его лев, и порази его.
И обретает человека иного и рече: «Бий мя», и бий его человек той, и сокруши лице его. Что убо будет сего преславнейши, — бивый пророка спасеся, а пощадевый мучен бываше? Да навыкнеши, яко, богу повелевающю, не достоит испытовати естество бываемых, но повиноватися точию.
Тако же и вси святии и преподобнии и богоноснии отци наши, пастырие же учителие, моляху благочестивыя царя же и князя, яко да еретики потребят.
Яко же сведетельствуют святии отци святаго вселеньскаго шестаго собора, глаголюще сице благочестивому царю Иустинияну: «Ты же, о царю, потъщися о сем, яко, аще некако останок еллиньский июдейский еретическиа злобы в зрелую пшеницу вместилъся будет, искоренити яко плевелы, да въсторъгнутся, и чиста явится церковна нива, теплотою к богу любве, царей же и властелей ревнителя Финееса преспевших, и грех прободших копием».
Глаголют же святии отцы, иже во Иерусалиме събравшеися, тысяща и четыреста, иже многосложный свиток написаша к Феофилу царю греческому: «Ты же, о царю, призри к молитве смиреных, ущедри церковь свою, устави церковныя раздоры, угаси первее зловерных отметник, силою праведнаго своего царства, мышцею благочестия своего».
Яко же прьвый начяток хрестиаиом православный, иже во царех апостол великий Констянтин праведный, темнаго оного и богопротив наго втораго Июду Ария, гневу тезоименита, со проклятыми его учении[4] до конца низложи и в заточение осуди, тако же и всех, иже тая же мудръствующих.
По сем же пресветлая звезда, царьским преиматель, Феодосие великий, иже повелением его божественый собор вторый святых отец собра, на Македониа духоборца, и на Евномиа, и на арианы, и на сих проклят, и в заточение з безчестием осуди. И сему суще преиматель умом и именем, Феодосие малый, вь Ефесе святый собор собрав и Несториа низложи. Великий же в благочестии Маркиан четвертый собор собра, Евтихия и Диоскора суесловца прокляти повеле и в заточение осужаеть.