Троицкие листки

Царь же, забыв первую печаль, о другой скорбяще и неутешно о смерти брата своего рыдаше. Умершего же душу поем Ангел Божий, вознесе во обители небесныя и, обходящи тамо селение, показоваше ей многия предивныя, красные и светлые палаты. Бе же едина паче иных краснейша и светлейша, ея же красоты несть можно изреши. И вопроси Ангел душу: "В коей из всех тех палате изволяеши жити?" — Душа же, смотрящи на краснейшую ону палату, рече: "Аще бы мне в едином угле палаты сея пребывати было дано, ничтоже более требовали бы". Рече же Ангел: "Не можеши в сей палате жити, брата бо твоего есть, юже странный оный Фома данным ему златом созда". И рече душа: "Молюся тебе, Господи, пусти мя к брату, и аз искуплю от него палату сию, не весть бо он красоты ее. Искупивши же, паки возвращуся семо". Тогда Ангел возврати душу в тело, и абие умерый оживе, и, аки от сна воспрянув, предстоящих о брате вопрошаше и моляще, да приидет к нему царь — брат его. Слышав же царь, яко оживе брат, возрадовася зело и притече к нему. Видящи же его жива, ужасен радовашеся. Воскреснувый же нача к нему глаголати: "Вем несумненно, царю, яко любиши мя, брата своего, и плакал еси о мне. И аще бы мя мощно было искупити от смерти, дал бы еси и до полцарствия своего". И рече царь: "Ей, поистинне тако есть, и несть инако". Рече же брат: "Аще тако любиши мя, прошу у тебе единого дара, да не отречеши ми".

И рече царь: "Вся, яже под рукою моею в державе моей, любимому тебе брату моему дарую". И клятвою утверди царь слово свое. Тогда рече воскреснувый брат: "Даждь ми палату твою, юже имаши на небесех, и все мое богатство за оную возми себе". Царь же, слышав сие, усумнеся и, яко безгласен, молчаше. Посем рече "Откуду мне есть на небесех палата?". И рече брат: "Воистину, такова палата есть, каковая ты не знаеши, ниже видел еси когда в поднебесней, созда же ю тебе Фома, коего в темнице держиши. Аз видех ю и дивихся неизреченной доброте ея, и хотех бы во едином углу тамо жити, но не дано бысть мне. Рече бо водяй мя Ангел, яко не мощно мне в ней жити, брата бо моего есть палата сия, юже странный оный Фома созда. Молих же Ангела, да мя отпустит к тебе, брату моему, дабы искупил у тебе палату ону, ибо аще любиши мя, даждь ми ю, а себе возьми вся моя имения".

Тогда царь о двух возвеселися: о воскресении братнем и о палате, на небесех ему созданней. И рече воскресшему брату: «Возлюбленный брате, кляхся тебе не возбранити ничтоже от тех, яже суть на земли под державою моей, а яже на небеси палата — тоя не обещах ти. Но аще хощеши, имамы у себе такового зодчаго, той убо и тебе да созиждет". И сия рекши, царь посла абие в темницу извести Фому святого с Аваном купцом, приведшим его. И тек в сретение Апостолу, паде на нозе ему, прощения прося, яко в неведении согреши. Апостол же, благодарив Бога, нача обоих братов учити вере в Господа нашего Иисуса Христа. Они же умиляющиеся, приемляху любезно словеса его, и вскоре крести их и всему христианскому житию научи. И создаша себе оба брата милостынями многими вечные обители на небесех. Апостол же, некое время с ними пребыв и в вере их добре утвердив, отъиде в окрестные грады и веси, неся спасение душам человеческим.

(Рассказ из жития святого апостола Фомы)

591. Праздник Рождества Пресвятой Богородицы в Церковных песнопениях

Листок второй

«Величай, душе моя, преславное рождество Божия Матере.

Грядите, вернии, Духом Божественным радующеся, песньми почтим Юже от неплодове днесь Пришедшую, на спасение человеков, Приснодеву Отроковицу.

Боговместимая Отроковица и Богородица чистая, Пророков слава, Давидова дщи, днесь раждается от Иоакима и Анны целомудренныя, и Адамова клятва яже за нас потребляется рождеством Ея.

От неплодныя старицы, престарелыя Анны, жизнь и свет возсия — всенепорочная Отроковица, дверь Востока (Христа), свет концем воссиявшая неизреченно: лик (хор) составльше, ублажим Ю, яко земных превышшую.

Радующеся днесь, с веселием воспоим Божественное Рождество Богоматере, ибо роди Радость вселенней, печаль праматере потребляющую.

Рождение честно Девы всесвятыя, Еяже ради обновися мир, жененными гласы почтим.

Ко Господу в скорби неплодства возопиша Богомудрии родителе Богоматере, и Сию в роды родов родиша, на общее спасение и похвалу. Анна Богомудренна истиною, гнездо птиче прежде видевши на древе, свое безчадие помянувши, вопияше: увы мне, Господи, Господи! Аз грешна едина обнищах плодотворения от Тебе. Тогда Человеколюбец Бог даде плод ей Деву, честнейшую всея твари.

Молитва купно и воздыхание неплодства и безчадства Иоакима и Анны благоприятное, во уши Господни вниде, и прозябе плод живоносен миру: ов бо молитву на горе творяше, ова же в сад поношение нашаше; но с радостию неплоды раждает Богородицу и Питательницу Жизни нашея.

Богомудрии родителе Богоматере прияша достоин небесный дар от Бога, самых Херувимов превышнее носило (Христово), Родительницу Слова и Зиждителя.

Всех спасение родисте, непорочно Богу пожившии, Богомудрии родителе Рождшия Зиждителя и Бога нашего.

Иоаким и Анна ублажаются, рождши блаженную, яве чистую Богоматерь, блаженное Слово рождшую, Совершающаго (Соделывающего) блаженны вся верныя.

О блаженная двоице! Вы всех родителей превзыдосте, яко твари всея Преимущую (Превосходящую) прозябли (родили) есте. Истинно блажен ecu, Иоакиме, таков вы Отроковицы быв родитель! Блаженна ложесна твоя Анно яко Матерь Жизни нашея прозябла ecu; блаженни сосцы, имиже воспитала ecu млеком Питавшую Питающаго всякое дыхание, Егоже молити вам, всеблаженнии, молимся, помиловатися душам нашим.

Блаженно чрево Аннино бысть: породи бо Хотящую во чреве вместити Блаженное и Невместимое Слово, возрождение всем верным подающее.

Благословенно чрево твое, целомудренная Анно: израстила бо ecu плод девства, Юже без Семене рождшую Питателя твари и Избавителя Иисуса.

Плакала ecu от души, яко безчадна рыдающи, отрочате желающи; но родила ecu Отроча, рода всего похвалу.

О чрево, вместившее Божие селение (Приснодеву)! О утробо, носившая небес Ширшую, престол мысленный, святый кивот священия!

Святая святых — Младенец во святем святилищи возлагается, воспитатися от руки Ангеловы: ecu убо верно спразднуем в рождестве Ея.

Хвалу Избавителю принесем Господу, от неплодове давшему нам Богородицу и едину Приснодеву.

Воспеваем Тя, Господи, подавшаго всем верным спасительное пристанище — Тебе Рождшую.

Слава Тебе, прославльшему неплодную днесь: роди бо от обещания (по обетованию) жезл присноцветущий, от негоже прозябе Христос, Цвет жизни нашея.

Всем жизнь источаяй Господь от неплодове произведе Деву, в Нюже вселитися изволи, по рождестве сохранив нетленну.

Сотворивый преславная неплодней утробе, отверзый Анны нераждающая ложесна и дав ей плод, Ты, Более Святый, Ты, Сыне Девы, Ты от сея плоти приял ecu, присноцветущия Девы и Богородицы.

Делателю мыслей наших и Насадителю душ наших, Ты, неплодную землю показавый благоплодну, Ты древле сухую соделал ecu родовиту, благокласну, бразду плодоношу (Анну святую) израстити пречистый плод (Богородицу).

Днесь, Иже на разумных престолех почиваяй, Бог престол свят на земли Себе предуготова; утвердивый мудростию небеса, Небо одушевленное человеколюбием Себе содела: от неплоднаго бо корене сад живоносен израсти нам — Матерь Свою — иже чудес Бог и ненадеющихся Надежда: Господи, слава Тебе!

Во благознамеиитый день праздника нашего вострубим духовною цевницею: Яже бо от Семене Давидова днесь раждается Мати Живота, тьму разрешающи, Адамово обновление и Евино воззвание, и нетления источник, тли пременение. Еяже ради мы обожихомся и от смерти избавлени быхом, и вопием Той с Гавриилом верный: Радуйся, Благодатная: Господь с Тобою, Тебе ради даруя нам велию милость.

Всемирная радость от праведных возсия нам Иоакима и Анны всепетая Дева, Яже премногия ради чистоты храм Божий одушевленный бывает, и едина воистину Богородица познавается; Тоя молитвами, Христе Боже, мир миру ниспосли и душам нашим велию милость.

Днесь да веселятся Ангельстии чини, песньми да ликуют сущий из Адама: родися бо жезл, возрастивший Цвет — Христа, единаго Избавителя нашего.

Да радуется небо, и земля да веселится: Божие бо небо на земли родися —Богоневестная, Сия от обетования; неплоды питает младенца Марию, и радуется о рождестве Иоаким, глаголя: жезл родися мне, из негоже Цвет — Христос прозябе из корене Давидова: воистину чудо преславно!