«Небо и землю Той наполняет во всяком времени и месте предстояй».

Небо и небо небесе не довлеют Ему (3 Цар.8,27).

«Седяй на Херувимех на престоле высоце и превознесение. Тысящи тысящ служат Ему и тмы тем предстоят Ему. Его же вся боятся и трепещут, яко никтоже постоит пред великолепием славы Его».

Аще отверзет небо, трепет приимут от Него горы и растают, яко тает воск от лица огня (Ис.64,1).

Яко Господь Вышний страшен Царь великий по всей земле (Пс.46,3).

Великий Господь наш и велия крепость Его и разума Его несть числа (Пс.146,5).

У Него премудрость и сила, у Него совет и разум (Иов.12,13).

Творяй великая же и неизследованная, славная же и ужасная, им же несть числа (Иов.5,9).

«Посылаяй свет и идет; призва его и послуша его с трепетом, звезды же возсияша в хранилищах своих. Глаголяй солнцу и не восходит, звезды же печатствует».

Измеривый горстию воду и небо пядию и всю землю горстию, поставивый горы в меримех и холми в весе (Ис.40,12).

Содержаяй круг земли и живущие на ней, аки пруги; поставивый небо, яко камару и прострый е яко скинию обитати (Ис.40,22).

«На всяком месте очи Господни, тмами тем крат светлейший солнца, прозирающий вся пути человеческия и разсмотряющий в тайных местех».

Вся сердца испытует Господь и всяко помышление разумеет (1 Пар.28,9).

Вся пути наша провидит и вся стопы наша изчитает. Словеса Его, яко огнь горящий и яко млат, сотрыющий камень. Правда Его во веки и милость Его во веки. Милует всех и презирает грехи человеком в покаяние. Любит же сущая вся и нечесого же гнушается, яже сотворил есть; щадит же вся, яко Его суть, Владыко Душелюбец (Прем.11,2327).

Отец сирых и Судия вдовиц, прибежище убогому, очи Его на нищего презирают. Несть Свят, яко Господь, и несть праведен, яко Бог наш (1 Цар.2,2).

Той есть прежде всех и всяческая в Нем состоятся (Кол.1,17).

Отец сирот и Бог всякия утехи, утешаяй нас о всякой скорби нашей и Той есть Бог кающихся. Иже всем человеком хощет спастися и в разум истинный приити. Кто уразуме ум Господень и кто советник Ему бысть, иже научает Его (Ис.40,1314).