Слава: Яко добрии кормчий Архангели, ко пристанищу Божественныя воли душевный корабль Мой направите, от бури грехов падший и бедствующий.

И ныне: Невестокраситель, божественный Архангел представ, возглашайте Тебе: радуйся, Невесто Божия безневестная, Ангелов славо и человеков спасение и ограждение.

Песнь 9, ирмос

Всяк земнородный да взыграется духом просвещаемь, да торжествует же безплотных умов естество, почитающее священное торжество Богоматере, и да вопиет: Радуйся, Всеблаженная Богородице, Чистая Приснодево.

Благолепие всечестнаго храма твоего, Архангеле, священнотайне твоим присутствием осияваемое, чудес молнии испущает и тьмы недугов отгоняет Божественною благодатию.

Яко двоица прекрасная и светолепная суще, Владычним повелением сущим на земли служите, Михаиле преславне и Гаврииле досточудне, от лютых изъимающе, и всем просвещение посылающе спасительное, Божественным Духом.

Слава: Днесь радуются с нами безтелеснии умы, воспеваема видяще своего великаго и светлаго Архистратига, и любовне с нами сопразднуют, Жизнодавца величающе.

И ныне: Глас божественнаго Гавриила приносим Тебе радостно, Всечистая, и взываем: радуйся, раю, посреде древо жизни имеяй; радуйся Бога Слова жилище и чертоже. Радуйся, воззвание Адама и всего рода человеча!

Светилен

Якоже древле укротил еси реки безчинная устремления и шумения, Архистратиже славы, тако и ныне языков гордыню и демонов свирепства потреби, да по долгу тя чтем в песнех достойно.

Богородичен:

Почитают Рождество Твое безплотных чини, радости бо вся земная Ты наполнила еси Едина: тем Тя Всенепорочную вернии славим, в пениих славословяще.

На хвалитех стихиры, глас 1й

Небесных чинов яко предначальника, и сущих на земли человеков крепкаго тя предстателя, хранителя же и избавителя воспеваем верно, Михаиле Архистратиже, молящеся всякия тлетворныя болезни нас избавити.

Чиноначальник сый Горних Божественных Сил, днесь созывает человеческия лики, един со Ангелы светлый праздник составите, и купно песнь Богу воспета трисвятую.

Огненных слуг Божиих предстоятельство от Отца светов приял еси, Михаиле, тем и сияние Того Славы сияющее на тебе имаши, окрест страшнаго престола предстоя, яко первостоятель Ангельских невещественных чинов.

Под кров невещественных крил прибегающия ны верою, Михаиле богоозаряемый уме, соблюдай и покрывай чрез все житие, и в час смертный предстани, яко помощник всем нам благонадежнейший.

Слава, глас 5й: Идеже осеняет благодать твоя, Архангеле, оттуду диаволя прогонится сила: не терпит бо света твоего видети спадый с небеси денница. Тем молим тя, огненосныя его стрелы, яже на ны движимыя, угаси твоим дуновением.

И ныне: Блажим Тя, Богородице Дево, и славим Тя вернии по долгу, яко град неколебимый, стену необоримую, твердую Предстательницу и прибежище душ наших.