Кондак 8

Странно и чудно у дуба Мамврийска узрев Тя Авраам во образе триех мужей, аки к единому беседоваше, глаголя: Господи, аще обретох благодать пред Тобою, не мини раба Твоего! Трием убо, в триех явлынихся ему Лицах, Отцу и Сыну и Святому Духу, единому же в Существе Богу, до земли поклонися, зовый: Аллилуиа!

Икос 8

Весь еси везде и всегда, не точию могуществом неизчетныя силы Твоея, но и богатством вседетельнаго промышления Твоего о всяком создании Твоем: нам же, якоже рече Сын Твой, и власи главнии вси изочтени суть у Тебе, да ни един из них падет без воли Твоея: темже уповающе на Промысл Твой, со дерзновением и любовию зовем: Свят, Свят, Свят еси, Господи Боже наш, благоволивый всему роду человеческому разделитися на племена и языки, и коемуждо их место и время жительства указавый! Свят еси, Господи Боже наш, Имже царие царствуют и сильнии пишут правду, соблюдаяй избранных Своих, яко зеницу ока! Свят еси, Господи Боже наш, от Негоже исходит всяка премудрость и разум, всяка крепость и сила, всяко здравие и лепота! Свят еси, Господи Боже наш, наводяй и отъемляй брани, венчаяй победою правое оружие, неправое же посреде самых побед предопределяяй к сокрушению! Свят еси, Господи Боже наш, даяй знамения на небеси и на земли, посылаяй огнь, язву и глад на люди, да не до конца заблудят от путей Твоих! Свят еси, Господи Боже наш, возносяяй смиренныя от земли, еже посадити со князи люди Своя, и низлагаяй гордыя, яко не обрестися месту их! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 9

Всякое естество, горе и низу, непрестанно славит Тя, Предвечнаго Творца и Бога: на небеси едини, Свят, Свят, Свят, день и нощь взывают, друзии же венцы своя к подножию ног Твоих полагают: на земли же со всею тварию мы, яко украшенныя образом присносущныя Твоея славы, к Тебе молимся и от Тебе великия и богатая милости чаем, зовуще: Аллилуиа!

Икос 9

Ветии многовещанныя, аще и много труждаются мыслию во испытании о таинстве Пресвятыя Троицы, но не могут разумети, како естеством един есть Бог, в триех же совершенных Лицех: мы же веруем точию сему и исповедуем, какоже, не испытуем, и неизчетныя благодеяния к нам коегождо из триех Божественных Лиц добре ведуще, с верою и благодарением зовем: Свят, Свят, Свят еси, Господи Боже наш, праведным судом Твоим всем нам в землю, от неяже взяты есмы, возвратитися, и паки в день воскресения из нея востати положивый! Свят еси, Господи Боже наш, солнцу, луне и звездам некогда померкнути, земле и всему, еже на ней, огнем преобразитися предопределивый, да вместо их явится небо ново и земля нова, в нихже правда живет! Свят еси, Господи Боже наш, уставивый день, в оньже предстанут на суд вся племена и языцы, да восприимет кийждо по делом своим! Свят еси, Господи Боже наш, имеяй в день воздаяния рещи праведным: приидите благословеннии Отца Моего, и наследуйте Царствие, уготованное вам от сложения мира! Свят еси, Господи Боже наш, от Негоже нераскаяннии грешницы услышат тогда со страхом: отъидите от Мене проклятии во огнь вечный, уготованный диаволу и аггелом его! Свят, Свят, Свят еси, Господи Боже наш, помилуй ны, падшее создание Твое, имене ради святаго Твоего!

Кондак 10