Преславная днесь видеша вси языцы во граде Давидове, егда Дух сниде Святый во огненных языцех, якоже благоглаголивый Лука повествует, глаголет бо: собранным учеником Христовым, бысть шум, якоже носиму дыханию бурну, и исполни дом, идеже бяху седяще: и вси начаша глаголати странными учении, странными повелении Святыя Троицы. (Дважды.)

Дух Святый бе убо присно, и есть, и будет, ниже начинаем, ниже престаяй, но присно Отцу и Сыну счинен и счисляем, живот и животворяй, свет, и света податель, самоблагий, и источник благостыни: Имже Отец познавается, и Сын прославляется и от всех познавается, едина сила, едино счетание, едино поклонение Святыя Троицы.

Дух Святый, свет и живот, и живый источник умный: Дух премудрости, Дух разума: благий, правый, умный: обладаяй, очищаяй прегрешения: Бог и боготворяй: огнь, от огня происходяй, глаголяй, деяй, разделяяй дарования, Имже пророцы вси и божественнии апостоли с мученики венчашася: странное слышание, странное видение, огнь разделяяйся в подаяние дарований.

Слава, и ныне, глас 6й: Царю Небесный, Утешителю, Душе истины, Иже везде сый и вся исполняли, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Молитва к Богу Отцу

Всемогущий Владыко, премудрый и всеблагий Господи, светоначальнаго Сына Пребезначальный Родителю, и Животворящаго Духа Твоего вечный и присносущный Самоизводителю, Егоже величество неисчетно, и слава несказанна, и милость безмерна! Благодарим Тя, яко воззвал еси нас от небытия и почтил еси драгоценным образом Твоим, яко даровал еси нам недостойным не точию познавати и любити Тя, но еже сладостнейше есть, и Отцем своим нарицати Тя. Благодарим Тя, Боже милосердия и щедрот, яко преступивших заповедь Твою не оставил еси нас посреде греха и сени смертныя, но благоволил еси Единороднаго Твоего Сына, Имже и вецы сотворени суть, послати на землю нашего ради спасения, да вочеловечением Его и страшными страданьми мучительства диаволя и тли смертныя свободимся. Благодарим Тя, Боже любве и сил, яко, по вознесении на небо дражайшаго Спасителя нашего, умолен быв Крестом Его, низпослал еси и Духа Твоего Пресвятаго на избранныя Его ученики и апостолы, да силою Богодухновенныя проповеди их, озарят весь мир нетленным светом Евангелия Христова. Сам убо, человеколюбивый Владыко, услыши ныне смиренную молитву недостойных чад Твоих, и якоже создал еси нас за едину Твою благость, искупил еси ны за едино благоутробие Твое, тако и спасеши нас по единому безприкладному милосердию Твоему: зане от дел наших ниже стени спасения имамы, но чаяние праведныя мести и отлучения от пресветлаго Лица Твоего: Аще бо и о единем празднем глаголе взыскано будет в день суда и испытания, о неисчетных наших беззакониих, имиже согрешихом пред Тобою, кий, бедные, имамы воздати ответ; Сего ради весьма от дел наших отчаявшеся оправдания, ко Твоей единей, всяк ум и всяко слово превосходящей, прибегаем благости, юже аки твердое основание надежды имуще, молим Тя: согрешихом, очисти, Господи! беззаконновахом, прости, Владыко! прогневахом Тя, примирися, Долготерпеливе! и сохрани прочее ум, совесть и сердце наше от скверн мирских, избави и спаси ны от многомятежныя бури страстей и грехопадений, вольных же и невольных, ведомых и неведомых, и в тихое нас управи пристанище веры, любве же и упования жизни вечныя. Помяни нас в милости Твоей, Господи, даруй нам вся, якоже ко спасению, прошения, паче же чистое и безгрешное житие: сподоби нас любити Тя, и боятися от всего сердца нашего, и творити во всем волю Твою святую, молитвами Пречистая Владычицы нашея Богородицы и всех святых Твоих. Яко благ и человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и Животворящим Твоим Духом, ныне и присно и во веки веков. Аминь.

Молитва к Богу Сыну

Единородне Сыне и Слове Божий, изволивый нашего ради спасения воплотитися и смерть претерпети, ныне же, и со пречистою Плотию Твоею, на небесах на престоле со Отцем седяй, и всем миром управляяй! Не забуди милосердием Твоим нас, долу сущих и многими напастьми и скорбьмй искушаемых, иже аще и весьма нечисти и недостойни есмы, но в Тебе Спасителя и Господа нашего веруем, и иного Ходатая и надежды спасения не вемы. Подаждь, о Искупителю Всеблагий, да памятуем выну, коликих мучений души и тела Твоего потребно бяше, во еже удовлити за грехи наши вечной правде Отца твоего, и како даже до ада со Креста низшел еси пречистою душою Твоею, да нас от власти и мучительства адова свободиши: памятуя же о сем, да блюдемся от страстей и грехов наших, бывших виною лютых страданий и смерти Твоея, и да любим правду и добродетель, еже всякаго дара Тебе в нас приятнейши есть. Яко искушенный по всяческим, Сам веси, о Всеблагий, коль велика есть немощь духа и плоти нашея, враг же наш силен и злохитр, иже яко лев рыкая ходит, иский кого поглотити: не остави убо нас Твоею всесильною помощию, и буди с нами выну, храня и покрывая, наставляя и укрепляя, радуя й веселя дух наш. Мы же, на лоно любве и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да имиже веси судьбами, сотвориши нам прейти безбедно мрачную жития сего земнаго юдоль и достигнута Богокраснаго чертога Твоего, егоже обещал еси уготовати всем верующым во имя Твое и последующым Божественным стопам Твоим. Аминь.

Молитва к Богу Духу Святому