Канон, глас 6й

Песнь 1, ирмос

Волною морскою, скрывшаго древле, гонителя мучителя под землею скрыта спасенных отроцы: но мы яко отроковицы, Господеви поим, славно бо прославися.

Припев: Слава Страстем Твоим, Господи.

Преклонил еси колене моляся, Емуже покланяется всякое колено небесных, земных и преисподних. Приклонися к молению моему, и услыши мя, якоже Отец молящася Тя услыша.

Отче, в молении глаголал еси, да Тебе истиннаго Сына покажеши, на раны готов есмь, аще и единаго зла не сотворих: мене, Иисусе мой, многа зла сотворша, многих избави мучений.

Слава: В поте лица твоего хлеб твой снеси, рекл еси падшему человеку: темже яко вторый Адам егда молился еси, пот крове изливашеся из Пречистого Тела Твоего: брашно бо Твое волю Отчю творити. Ни едину убо заповедь Твою сотворшаго, Иисусе Христе, потом Крове Твоея каплющим омый мя.

И ныне: Не ктому земля проклята есть, Кровию бо Сына Твоего благословляется: земле благословенная, Пречистая Дево, воздвигни мя, прах и пепел, на славословие Христа, Бога нашего.

Песнь 3, ирмос

Тебе, на водах повесившаго всю землю неодержимо, тварь видевши на лобнем висима, ужасом многим содрогашеся, несть свят, разве Тебе, Господи, взывающи.

Отягчени быша сном апостоли, егда отшел еси от очию их на молитву в вертограде Гефсиманстем: лениваго мя и унылаго на Твое поклонение воздвигни.

Яко истинный Пастырь, видев волка Иуду грядуща, Аз есмь друже, глаголал еси ученику лукавому, к покаянию наставляя падшаго: мене всегда согрешающа, и николиже в чувство приходящаго направи, Господи мой, на путь правый, и от челюстей мысленнаго волка силою Твоею избави.

Слава: Со оружием и дрекольми яко на разбойника приходят, Егоже яко жертву нескверну в Церкви искати подобаше: о моих гресех жертву приносимую Тебе, Господи, не презри.

И ныне: Коснувся уха усеченнаго, исцели раба архиереева Сын Твой, Врач душ и телес: вся моя душевныя и телесныя, Дево, исцели болезни, Целителя рождшая.

Седален, глас 6й

Не отвещал еси ничтоже власть на Тебе мневшему имети, гордым противляяйся: но многою лжею безстудных утружден, молчиши, да мя многоглаголания избавиши, и вся терпети научиши.

Слава, и ныне: Богородичен:

Премени скорбь мою на радость, Дево Богородице, Яже многи скорби претерпела еси, зрящи многостраждуща Сына Твоего мене ради осужденнаго.