Свт. Иннокентий Херсонский
Стихиры, глас 8й. Самогласны
Воспоим вси боголепно песньми божественными, Отца Безначальна, Сына Превечна и Духа Соприсносущна, Триипостасную державу, Едино Божество, едино царство и господство, едину волю и силу, пред Ними же всяко колено преклоняется небесных, земных и преисподних. (Дважды.)
Отцу и Сыну и Духу верно поклонимся вси, Троице Единосущней и Нераздельней, Юже выну славословят на небеси безплотных чинове: мы же Тоя милости и щедроты исповедуя, на земли возопиим: Отче создавый, Сыне искупивый, и Душе Святый освящаяй всех нас, Троице Пребожественная, слава Тебе! (Дважды.)
Егда в начале род человечь восхотел еси создати, Господи, тогда к Сыну Твоему собезначальному и Духу соприсносущному рекл еси, Благоутробне: сотворим человека по образу и подобию Нашему! Темже человеколюбному о нас смотрению чудящеся, вопием: Троице Пресвятая и благопромыслительная, Творче и Боже наш, слава Тебе!
Егда от Иоанна крещение совершашеся во Иордане, Тройческое явися поклонение, Отец возлюбленнаго Сына именуяй, Сын приемляй крещение от раба, Дух Святый сходяй с небесе в виде голубине: темже Божественным видением таинству наученнии, с верою вопием: Троице единосущная, тако явитися благоизволившая, помилуй и спаси нас!
Слава, и ныне, глас тойже: Приидите людие, Триипостасному Божеству поклонимся, Сыну во Отце со Святым Духом: Отец бо роди бездетно Сына соприсносущна и сопрестольна, и Дух Святый бе во Отце, с Сыном прославляемы едина сила, едино существо, едино Божество, Емуже покланяющеся, вси глаголем: Святый Боже, вся содеявый Сыном, содейством Святаго Духа: Святый Крепкий, Имже Отца познахом, и Дух Святый причде в мир: Святый Безсмертный, утешительный Душе, от Отца исходяяй и в Сыне почиваяй, Троице Святая, слава Тебе!
На стиховне стихиры, глас 2й
Троицу единосущную песнословим, Отца и Сына и Святаго Духа, Сию бо проповедаша вси пророцы, и апостоли с мученики.
Стих: Сердце чисто созижди во мне, Боже, и Дух прав обнови во утробе моей.
Света безначальна и присносущна Отца, света незаходима и соприсносущна Сына, со Духом предвечно исходным светом, верою славим, любовию поем и надеждою превозносим во вся веки.
Стих: Не отвержи мене от лица Твоего и Духа Твоего Святаго не отыми от мене.
Имеяй на небеси неумолкныя певцы славы Твоея, безплотных чинове, приими и от нас на земли хваление, Троице Пребожественная, ихже создала еси по образу и подобию Твоему.
Слава, и ныне: Видехом свет истинный, прияхом Духа Небеснаго, обретохом веру истинную, нераздельней Троице покланяемся, Та бо нас спасла есть.
Таже: Господи, помилуй. (12 раз.) Слава, и ныне: Приидите, поклонимся: (Трижды.) Псалом 138: Господи, искусил мя еси и познал мя еси...
Тропарь, глас 8й
Благословен еси Трисвятый Господи Боже наш, Иже всю тварь премудростию Твоею создавый, и падший род человечь милостию Своею не оставивый, покаявшимся же грешником живот вечный даровати обещавый, Человеколюбие, слава Тебе!
Господи, помилуй (трижды). Слава, и ныне: Псалом 50... Помилуй мя, Боже...