2. Ликования

«Христос раждается: славите! Христос с небес: срящите! Христос на земли: возноситеся! Пойте Господеви вся земля и веселием воспойте людие, яко прославися.

Небо мне показася днесь земля: на ней бо раждается Творец, и в яслех восклоняется; со Ангелы поют пастырие непрестанно: в вышних слава мир в мире!

Ликуют Ангели вcu на небеси, и радуются человецы днесь, играет же вся тварь рождшагося ради в Вифлееме Спаса Господа: яко всяка лесть идольския преста, и царствует Христос во веки.

Радуимся, вернии, и расширим уста, слово плетуще от словес сладкопения (венец исплетем из словесных цветов).

Веселитеся, праведнии; небеса, радуйтеся; взыграйте, горы, Христу рождшуся: Дева седит, Херувимом подобящися, носящи в недрах Бога Слова воплощенна; пастырие Рожденному дивятся; волсви Владыце дары приносят; Ангели воспевающе глаголют: непостижиме Господи, слава Тебе!

Благовествуй Иосифе, чудеса Давиду Боотцу: Деву видел ecu рождшую, с пастыри славословил ecu, с волхвы поклонился ecu, Ангелом весть прием...

С Иаковом воспоим славным Богобратом Давида Богоотца, Иосифа же Божественного, Богородицы обручника: Христову бо Божественному рождеству во граде Вифлееме послужиша боголепно, со Ангелы, волхвы и пастырьми Тому песнь поюще... яко Богу и Владыце.

Да поют радующеся царствия вся земная, отечествия же языков да веселятся горы и удолия, и холми, реки, море, и вся тварь Господа рождшагося величает.

Днесь Христос в Вифлеем рождается от Девы; днесь Безначальный начинается и Слово воплощается; силы небесные радуются и земля с человеки веселится; волсви Владыце дары приносят; пастырие Рожденному дивятся. Мы же непрестанно вопием: слава в вышних Богу и на земли мир, в человецех благоволение!

Днесь невидимое естество человеком от Девы совокупляется; днесь безмерное Существо в Вифлееме пеленами обвивается; днесь Бог звездою волхвы в поклонение приводит, провозвещая Свое тридневное погребение, яко во злате и смирне и ливане. Емуже поем: воплотивыйся от Девы, Христе Боже, спаси души наша!

3. Назидания

Из Персиды царие злато, смирну и ливан рожденному Царю и Богу принесоша древле; мы же ныне благочестномудренне, от души, надежду, веру и любовь принесем Ему, Деву поюще. Веру вместо злата, любовь же яко смирну, яко ливан — деяния принесем, вернии, Зиждителю, нас ради родитися плотию благоволившему.

Союзом любве связуеми, яко братолюбцы. Владущему всеми, мир зело возлюбившему, и давшему избавление Сына возлюбленного, дадим славу Дающему всем мир.