1. Ликования

Христос грядет ко крещению; Христос ко Иордану приходит; Христос ныне в воде погребает грехи наша, яко Благ: с веселием воспоим Ему, яко прославися.

Воспойте песни, Небесныя Силы; пойте, человецы, и радуйтеся согласно: се бо Владыка, Отчее Сияние, грядет к струям Иорданским, да крестится от раба; людие, воззовем: благословен явлейся, Боже наш, слава Тебе!

Земля и небо ныне да ликуют: всех Благодетель крещается, в водах погружая наше множество безмерных прегрешений.

Да радуется тварь, отечествия языков (народов) да поют: Иисус, Царь всея земли, предгрядет струями Иорданскими сотворити наше очищение.

Сладости поток — Христос к водам Иорданским раболепно приходит омытися: горы, взыграйте; холми, радостию препояшитеся; оскверненнии, ко очищению Божественному уготовитеся.

Днесь тварь просвещается, днесь всяческая веселятся, небесная вкупе и земная, Ангели и человецы смешаются; идеже бо Царево пришествие, тамо и чин приходит.

Днесь вод освящается естество, и разделяется Иордан, и своих вод возвращает струи, Владыку зря крещаема.

Возвеселися ныне, Иордане, и ликуй; Иоанне, взыграй; вся вселенная, радуйся: се явися Христос, и обнажается, и крещается, облачая человечество во одежду нетления.

Иордане реко, что удивился еси, зря невидимаго нага? Видех и вострепетах, рече, и како бо Сего не восхотех устрашитися и зайти? Ангели Его устрашишася зряще, ужасеся небо, и земля вострепета, и смятеся море, и вся видимая и невидимая: Христос явися на Иордан освятити воды.

Что возвращаеши твоя воды, о Иордане? Что воспящаеши струи, и не преходиши еже по естеству хождение? Не мощно ми терпети, рече, Огня, поядающаго мя; удивляюся и ужасаюся крайнему схождению: яко не обыкох Чистаго измывати, ни навыкох Безгрешнаго отирати. Но... терния попаляти ми согрешений учит иже во мне крещаемый Христос.

Облак и море древле прообразоваху чудо Божественнаго крещения, в нихже крестишася исходяще древнии законнии людие: море же бе образ воды, и облак — Духа.

Назнаменоваше иногда пророк славный (Елисей) крещения благодать, воды первее бесплодныя солию соделав многоплодными, силою явившагося Бога нашего.

Услади горесть вод солию Елисей, Твой же, Богомати, Сын и Бог, крещся в воде, греха горесть и болезнь отъят.

2. Назидания

Глас вопиющаго слышан бысть в пустых сердцах: возвеселитеся, предста Христос, оставление всем даруя; освятитеся вся — море, источницы и реки, и удолия (долины), и вся подсолнечная.

Иже от Адама назии, приидите вси, облечемся в Него, да согреемся, покрывает бо нагия и просвещает темныя.

Скверну всяк носяй, да омыет ю слезными каплями и Христу с трепетом да приступит, идущему очистити огнем и Духом Божественным естество наше.

Излиявше слезныя источники от очес, очистим, вернии, всяку скверну душевную и Свет во свете светом узрим, креститися Христу грядущу, Емуже присвидетельствует Отец с небесе и Духа Святаго пришествие блистает голубиным видом.

Скверно слово лукавых помышлений да не внесем; слову же Божественному поучившеся, песни да принесем Слову, нас ради плотию явльшемуся и просвещающему сущия во тьме, Егоже вся тварь благословит, славящи во веки.

Греховную мглу всю отложивше, чисти явимся Владыце, вся очищающему струями Божественными.