Премудрости Наставниче, смысла Подателю, немудрых Наказателю (Вразумителю) и нищих Защитителю, утверди, вразуми сердце мое, Владыко! Ты даждь ми слово, Отчее Слово, се бо устне мои не возбраню, бо еже звати Тебе: Милостиве, помилуй мя, падшаго.

О Христе, всех Царю, подаждь ми слезы теплы, да плачу мою душу, юже зле погубих!

От юности моея мнози борют мя страсти, но Сам мя заступи и спаси, Спасе мой!

Скорое и известное (несомненное) даждь утешение рабом Твоим, Иисусе, внегда унывати духом нашым, не разлучайся от душ наших в скорбех, не удаляйся от мыслей наших во обстояниих (бедствиях), но присно нас предвари, приближися нам, приближися, везде Сый, как со апостолы Твоими всегда еси, сице и Тебе желающым соедини Себе, Щедре, да совокуплени Тебе, поем и славословим Всесвятаго Духа Твоего.

Возопих всем сердцем моим к щедрому Богу, и услыша мя от ада преисподняго, и возведе от тли живот мой.

Воззвах Тебе, Господи, вонми, приклони ми ухо Твое вопиющу, и очисти, прежде даже не возмеши мене отсюду.

О ненавидящих и обидящих, и о умножении любви

О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякого зла и лукавства ко братолюбному и добродетельному настави жительству, смиренно мольбу приносим, да в согласном единомыслии славим Тя, единаго Человеколюбца.

Как первомученик Твой Стефан о убивающих его моляше Тя, Господи, и мы припадающе молим: ненавидящих всех и обидящих нас прости, во еже ни единому от них нас ради погибнути, но всем спастися благодатию Твоею, Боже всещедрый!

Пламенем любве распали к Тебе сердца наша, Христе Боже, да тою (любовию) разжигаеми, сердцем, мыслию же и душею, и всею крепостию нашею возлюбим Тя, и искренняго своего яко себе, и повеления Твоя храняще, славим Тя всех благ Дателя.

К Богоматери

Припади, душе моя, к Божией Матери и помолися Той, есть бо скорая помощница кающымся, умолит Сына Христа Бога, и помилует мя недостойного.

Ты моя Надежда, Всечестная, Ты мое и пение, Ты мое пристанище, Ты мое исправление, яже Бога Слова Отча воплощшагося несочтанно родила еси, темже Твоей несомненно покланяюся иконе, крепостию Твоею укрепляем.

Пресвятая Владычице, рождшая человеком Кормчию Господа, страстей моих непостоянное и лютое утоли смущение, и тишину подаждь сердцу моему.

Укреплься силою Твоею и благодатию, Тебе песнь усердно от сердца возложих, но сию приими, Дево чистая, благодать воздающи Твою многосветлую от нетленных сокровищ, Богоблаженная.

Никтоже, притекая к Твоему, Владычице, заступлению тепле, посрамится когда, но просит благодати, и дар приемлет к полезному, скорейший прошения.

Надежда и предстательство, и прибежище христиан, необоримая стена, изнемогающым пристанище небурное Ты еси, Богородице Пречистая, но яко мир спасающая непрестанною Твоею молитвою, помяни и нас, Дево всепетая!

Всю надежду мою на Тя, Всенепорочная, возлагаю, всю к Тебе, радуяся, простираю и душу, и помышление.

Надеждо непостыдная, надеждо известная, и стена непоколебимая, и покров, и помощница буди ми, Всенепорочная, уповающему на Тя, на Тебе возлагаю, Чистая, всю надежду спасения моего.

Имея Тя помощь, не постыжуся, Пречистая Мати Божия, имея Тя предстательницу жизни моея, спасуся.

Воззову в ноши и во дни, Всенепорочная, к Тебе, и спасуся, и сластей прейду стену, и избавлюся искушений демонских ходатайством Твоим.