Страница 3 из 4
И по окончании того знаменова его крестообразно и сотвори молитву, и постави его в чтецы и в поддияконы. На утрие же соверши его иерейским саном. И в третий день преподобный Сергий со архиереем Афанасием соверши божественную службу, и поуча его святитель по священным правилам и по божественному писанию. К сим же и иная учительная словеса изрек к нему и, духовно учредив, отпусти его. Сице Божиею благодатью сподобися священства и игуменства, не о себе (т. е. не сам) власть восхити, не о себе игуменство взя.
Прииде же Преподобный в монастырь, и сретоша его братия, и падше поклонишася ему до земли. Он же вниде в церковь и паде лицем на землю, со слезами моляся Владыце Христу и Пречистей Богородице и Святым и Небесным Силам бесплотным, и Предтече, и Апостолам, и великим святителем Василию Великому, Григорию Богослову и Иоанну Златоусту, дабы дал ему Господь Бог дерзновение у Престола Славы предстояти и бескровную жертву приносити о своих гресех и о чужих. И глаголаше к братиям: Апостол глаголет: плод духовный есть любы, радость, смирение, долготерпение, благость, благостыня, вера, кротость, воздержание. Мало же словесы глаголаше, вяще же делы учаше. Бе же числом иноков тогда 12, кроме игумена, и сице по два или по три лета бываше (1357, 1358, 1359). И аще един от числа убудет, или от монастыря изоидет, или ко Господу отъидет, и тогда другого на место его приимаше, да число не истощится.
Таже по времени (примерно около 1360 года) прииде ко святому Симон архимандрит из Смоленска, нарочит и честен, добродетельми сияя, и оставль архимандритию и вниде в монастырь к преподобному игумену Сергию и предаде ему вся имения своя на строение монастырю. И поживе много лет в смирении и в добродетелях, и в старости честней преставися ко Господу. Преподобный же погребе его честно и вечную память сотвори ему.
По сем же (около 1361 года) прииде брат Сергиев игумен Стефан от града Москвы к нему в монастырь и приведе с собою сына своего меньшого Ивана и предаде его брату своему, игумену Сергию. Он же постриже его в иноческий чин в день памяти св. преподобного Феодора Трихины и нарече ему имя Феодор2.
Многие же от различных градов прихождаху к игумену Сергию иноцы и миряне; Преподобный же всех принимаше со усердием. Пострищися хотящим повелеваше облещися в свиту долгу, яже от сукна черна, и в ней ходити с братиями время довольно, дондеже навыкает весь устав монастырский. Таже по сих облачаше в мнишескую одежду уже во всех службах монастырских искусившихся, в мантию и клобук. Егда же будет кто совершен и житием чист и искусен сый, таковаго сподобляше прияти и святую схиму.
Преподобный Сергий, аще бо и приял игуменство и власть, и честь, но не остави правила своего и собою образ всем дая и на дело прежде всех исходя, и на церковное пение прежде всех обреташеся, и николи же на стену восклоняяся; поздне же, вечеру глубоку сущу, нощию обхожаше келии братии своея. И аще кого услышаще молящася, или рукодельствующа, или прочитающа божественная писания, или о гресех своих сетующа – о сих радовашеся и моляше Бога о них, дабы до конца совершали доброе течение. Егда же слышаще дву или трех сошедшихся и глумящихся, в оконце потолкав, отхожаше, и на утрие призвав к себе, с тихостию и кротостью и с милостью научаше, непокорливых же епитимиями облагаше. И цветяше место то, и множашася братия.
Потом (примерно около 1364 года) приидоша Греки от Константинограда к святому Сергию в монастырь, от Филофея, патриарха Цареградского, и даша ему благословение от патриарха: крест, и парамант, и схиму, и грамоту. Блаженный же рече к ним: Не соблазнисте ли ся? Блюдите, еда ко иному посланы бысте; аз бо несмь достоин таковых от св. патриарха. Они же рекоше: Ты ли еси Сергий, живый в Радонеже? Он же рече: Аз есмь грешный чернец Сергий. Они же рекоша: Тебя благословляет Филофей, патриарх вселенский. Святый же по сем умолча и чествова их добре и повеле им пребыти в монастыр его. И в тот час сам, взем поминки и грамоту патриаршу, и пеш поиде ко блаженному Алексию митрополиту во град Москву. И пришед к блаженному Алексию митрополиту, и вдаде ему поминки и грамоту патриаршу, поведа же и глаголанная ему от посланных. Митрополит же, взем грамоту, и нача чести во услышание всем. Бе же написано сице:
«Божиею милостью кир Филофей, Константино-града патриарх вселенский, о. Святом Дусе сослужебнику нашего смирения Сергию благодать, и мир, и благословение. Слышахом по Бозе житие твое и прославихом Бога, яко же рече Господь: да возсияет свет ваш пред человеки, да видят добрая ваша дела и прославят Отца вашего, иже на небесех. Житие твое и братии твоея слышахом и похвалихом. Но еще ти едина главизна недостаточествует, яко не общее житие стяжал еси, его же сам пророк богоотец Давид, иже вся обсязавый разумом и ничто же ино возможе похвалити, токмо сице: се ныне что добро или что красно, но еже жити братиям вкупе? Сице и аз совет благ даю вам; послушайте убо смирения нашего и сотворите общее житие, да милость Божия на вас и Пречистыя Богородицы и всех святых и наше благословение и молитва да будут с вами».
Вопроси же преподобный игумен Сергий Алексия митрополита, како повелит ему быти, общему ли, пустынному ли житию? Алексий же митрополит отвеща сице: Яко же кир Филофей патриарх повелевает и благословляет, сице же и аз благословляю. И тако отпусти его с миром. Он же, пришед в монастырь свой, иже в Радонеже, и возвести братии писанное от Филофея патриарха Цареградского и советованное от блаженного Алексия митрополита всея Русии. Они же с радостью глаголаша: И мы, отче, зело желаем общего жития. Преподобный же Сергий возрадовался о единомыслии и согласии их и помышляше воле Божией быти. И тако разрядиша братию по службам: оваго келаря, оваго подкеларника, оваго казначея, оваго уставщика, овех трапезников, иных поваров, других хлебопеков, иных же больным служити. И все имение монастырское обще сотвориша, и никому же ничтоже свое держати, ниже своим звати что, но вся обща имети. Елицы же тако не восхотеша, отай изыдоша из монастыря. И оттоле уставися общее житие в монастыре св. Сергия иже в Радонеже.
Во един убо от дний, в монастыре Сергиевом поющим вечерню в день субботний, св. Сергий в алтаре священствуя, старший брат Сергиев Стефан стояше на крылосе и вопроси конархиста глаголя: Кто тебе повеле сию книгу взяти? Он же рече: Игумен Сергий повеле ми. Глагола Стефан: Кто есть игумен на месте сем? Не аз ли прежде седох на месте сем и церковь воздвигох? И иная некая изрече словеса нелепая. И то слышав блаженный Сергий в алтаре и не рече никому ничтоже. И егда братия вся изыдоша из церкви в трапезу на ужину, святый же не вниде в трапезу, ни в келью, но изыде из монастыря един, никому же ведущу. И приспе нощь, пребысть в пусте лесе, един моляся. И мало почив, заутра иде в путь свой и прииде в монастырь Живоначальныя Троицы на Мохрище ко игумену Стефану, родом из Киева, иже пострижеся в Киево-печерской Лавре, но от сильного гонения иноверных уклонися, основатель же бе того монастыря на Мохрище. И испроси Сергий у него себе брата ведяща указати ему места пустынная. И обрет место красно и зело высоко над рекою над Кержачем.
Братия же в монастыре его, иже в Радонеже, оскорбишася о нем и изыдоша мнози на взыскание его. И един брат обрете его на Кержаче и от радости не восхоте возвратитися к своим поведати о нем; после же паки иде, да не в скорбь впадут. Они же, слышавше, возрадовашася и начаша приходити к нему, овогда два, овогда три, иногда же и множае. Блаженный же Сергий на месте том постави себе келию и братиям, и посла два от ученик своих к преосвященному Алексию митрополиту, прося благословения основати церковь во имя Благовещения Пречистыя Богородицы. И благословение от святителя получив, и церковь основа; и быша многи делатели, иноцы же и миряне, князи и бояры и вельможи, много имения, сребра и злата приношаху на строение монастырю. И тако вскоре монастырь поставлен бысть на Кержаче во имя Пресвятыя Богородицы честнаго и славнаго Ея Благовещения.
От монастыря Св. Троицы, иже в Радонеже, братия смутишася и идоша в град Москву и молиша со слезами св. Алексия митрополита, дабы возвратил к ним от Кержача в Радонеж преподобного игумена Сергия в начальный его монастырь. Святитель же Алексий, послушав их, и вскоре посла два архимандрита Герасима и Павла к Сергию, глаголя сице: Довлеет тобою совершенная церковь и монастырь. Кого из своих учеников, того постави вместо себя строителя в монастыре своем на Кержаче, а сам возвратися в прежний монастырь свой св. Троицы, иже в Радонеже. Он же обещася тако быти, и возвратившеся архимандриты сказаша Алексию митрополиту. И тако св. Алексий вскоре посла священника к Преподобному, и свящаше церковь во имя Пречистыя Богородицы честного и славного ея Благовещения. Избра же преподобный Сергий единого от учеников своих, именем Романа, и посла его во град к святителю в пресвитеры ставитися, и поставлен бысть в священничество, и предаде ему преподобный Сергий новоначальный той свой монастырь строити, иже в Кержаче: а сам возвратися в прежний свой монастырь Пресвятыя Троицы, иже в Радонеже.