Страница 8 из 10
И блаженный Петр, иже всем учеником верховный, ничто же сделав отреченно или преобидение некое глаголаху, но точию возопи: «Господи, ты ли мои омыеши нозе? Не умыеши ногу мою во веки», — слыша от господа: «Аще не умыю тебе, не имаши чясти с мною!». Се и за малое прекословие что пострада и како прият запрещение, аще не бы предварил покаянием и гнев разори скоростию исправление!
Сиа убо ведый великый апостол Павел рече: «Тем же убо, о человече, ты кто еси сопротив отвещаяй богови? Еда речет здание создавшему его: почто мя сотвори тако? Или не имать власти скуделник брениа от того же смешениа сотворити ов сосуд в честь, ов же не в честь?». Тако и ты, по подобна брениа, безгласен буди, егда бог что устроити хощет. Великий убо верховный в постницех блаженый Антоние, егда спострада человеческому и сродному естеству, видяше бо человеки овы милуемы, овы мучимы, овы веселящася в богатьстве, иныя же в нищете стражуща, овы в старости живуща, иныя же в юности умирающа, и о сем не истязав, ни многовеществова, ни глагола съпротивно что, но на молитву обратися о сих, и слыша глас глаголющ ему: «Антоние, о себе пецыся, а тех не пытай, яже бог не повелел есть!».
Помысли, страстне и окаянне, ты кто еси, иж ниже сени онех достоин еси? И кая испытавши, бога многовеществуеши? Глаголет бо: «Аще отец есмь аз, где есть слава моя? Аще господь есмь, где есть боязнь моя?». Бояй бо ся не испытует, бояйся не истязует, но покланяется и славит и всему верует: яко же рече великий Павел о Авраме и о послушании его: «Иже в обетовании божием не усомнеся неверием, но возможе верою, и дав славу богови и извещение прием, яко же обетова, силен есть и совершите».
И пакы глаголет: «Праведный же от веры жив будет, и аще обинется, сиречь не верует, не благоволи душа моя о нем». Мы же, братие, несмы обиновению в погибель, но вере в снабдение души. «Есть же вера уповающим вещем состав и обличение невидимым; верою разумеваем совершитися веком, глаголом божиим и от невидимых видимо быти; без веры же невозможьно угодити богу».
И паки рече: «Оружиа убо воиньства нашего не плотьска, но силна богови, к разорению твердем и помыслы ни излагающа, и всяко вышение, высящееся на разум божий, и пленяюще всяк разум в послушание Христово». Ибо речено есть святым духом: «Верен господь во всех слове сех своих, или что повелевает, или отричет, или обещает, или запрещает». [31]Яже убо от сих до зде.
[31]
Сказание о глаголющих еже святый Ефрем написал есть, яко вся уже пророчества и писаниаскончя шася и ничто же ино о с тало есть, точию второе пришествие господа нашего Иисуса Христа, И се уже тысяща и сто лет преидоша, егда написал есть сиа святый Ефрем, а втораго пришествия господа нашего Иисуса Христа несть. И аще бы истинно было списание святаго Ефрема, было бы тогда же второе пришествие господа нашего Иисуса Христа, егда писал есть о сих святый Ефрем.
Иже сице глаголющей суть хотяще ввести в человеки лукавое мнение, яко да начнут человецы ложно имети списание преподобнаго и богоноснаго отца нашего Ефрема, и того деля вся писаниа святых отец наших ложна покажут. Но несть сего, и не будет! Яко же убо написал есть святый Ефрем, тако и святии и преподобнии и богоноснии отцы наши, и вси согласно и подобно пророческому и еуангельскому и апостольскому речению написаша.
И убо святии пророцы в мнозех родех преже Христова по плоти рождества бяху: ов убо 4000 лет и множае, яко же праведный Енох, и тысящу и 500 лет — великий Моисей, и тысящу лет — святый Давыд, и прочии вси святии пророцы преже рождества Христова быша во мнозех летех и вси рекоша и написаша о суде и о воздании, о хотящих быти, яко о ныне сущих, глаголаша.
Такожде и еуангельская и апостольская и святаго Ефрема и прочих святых отец наших писаниа подобна суть вся и согласна древним; кождо же в свое время рекл есть, святым духом подвизаем. Сего ради преже напишем пророческая речениа; та же еуангельская, потом же апостольская, по сих же святого Ефрема списание. И аще хощеши, увеси, яко ничто же разньствуют его списаниа от пророчьскых и еуангельских и апостольских списаний.
Преже убо всех о сем рекл есть древний пророк праведный Енох сице: «Се прииде господь во святых тмах ангел своих, сотворити суд по всех и изъобличити вся нечестивыа, о всех делех нечестна их, их же нечествоваша». Моисей: «Яко огнь возгорится от ярости, и разжжется до ада преисподняго; снесть землю и жита еа, и попалит основаниа горам». Давыд: «Бог яве приидет, бог наш и не премолчит, огнь пред ним возгорится и окрест его буря зелна призовет небо свыше, и землю разсудити люди своя».
И инде глаголет: «Сел еси на престоле судяй правду». И пакы: «Уготова на суд престол свой, и той судит вселенней в правду». И пакы рече: «И Преклони небеса и сниде, и примрак под ногама его; и взыде дым гневом его, и огнь от лица его воспланется». Исайя: «Се господь яко огнь приидет, и яко буря оружие его: огнем бо господним осудится вся земля, и оружием его всяка плоть».
И пакы рече: «Се убо гряду собрати вся страны и языки, и помышлениа их и дела их свем и воздам им. Се бо день господень грядет неисцелною яростию и гневом, поставите вселенную всю пусту, и грешники погубити от нея. Звезды бо небесныя и лепота, и все украшение небесное свет свой не подадят и помрачятся солнцу не восиявшу, и луна не даст света своего.
Ибо небо поколеблется, и земля подвижется от основаниа ея за ярость гнева господа Саваофа, в день, в онь же приидет ярость его. Господь и оружници его растлит всю вселенную и грешники погубить от нея. Рыдайте! Близь бо день господень, и сокрушение от бога приидет! И изыдут и узрят телеса человеческаа преступивших о мне, ибо червь их не скончяется и огнь их не угаснет, и будут в видение всякой плоти!».
Данил: «Видех в видении нощнем: и се на облацех небесных, яко сын человечь идый, и до ветхаго деньми достиже. И тому дастъся власть и честь и царство и вси людие и племена, и языцы тому поработают, и власть его — власть вечна, и царство его инем не оставится». Иезекииль: «Се — день господень, се—конец пришел есть. Се — знамение гнева господня. Извне рать и мечь и извнутрь глад и смерть.
Сребро их на стогнах повержется, и злато их преобидится; душа их не насытится, и чрево их не наполнится; и сребро их и злато не возможет избавите их от гнева господня». Михея: «Се господь исходит от места своего, и снидет и наступит на высоту земныя, и поколеблются горы под ним, и удолиа растаются яко воск от лица огню». Амос: «Тако глаголет господь вседержитель: На всех стогнах будет плачь и на всех путех речется: о, люте мне! о, люте мне!
И поколеблются воды от моря до моря и от севера до восток». Иоиль[32]: «Яко близ есть день господень, и смятется земля и потрясется небо; солнце и месяць померкнета, звезды угасят свет свой. Господь даст глас свой, яко велик день господень, велик и светел зело, и кто достижен ему? И предняа его рай пища, задняа его — поле погиблениа, и избывающаго от него не будет».
Наум: «Бог ревнив и мстяй, господь со яростию погубляа супостаты его. Господь скончанием запрещали морю и посушая е; горы потрясошася от него, и холми поколебашася, и усумнеся вся земля от лица его; ярость его растает власти, и камение сотреся от него». Малахиа: «Господь вседержитель приидет, и кто стерпит день пришествиа его? Зане той приидет яко огнь в горниле, и яко былие перущих, и сядет поядая и очищаа, яко сребро и злато.
И будут вси творящии беззаконие— стеблие; и сожжет я день грядущий, и не оставит им корени лоза, и будут яко же пепел, иже под ногами». Захариа: «Господь бог вседержитель явится, и изыдет яко же молниа стрела его. Господь бог вострубит трубою, и приидет в шуме прещениа своего. И приидет господь бог мой и вси святии [33]с ним[33]». Софониа: «Да говеют от лица господня вси, яко близ день господень великий, близ и скор зело!
Глас дне господня горек и жесток; день гнева — день той, день скорби и беды, день тмы и мрака, день облака и мглы, день трубы и кличя. И оскорбятся человецы и изыдут яко слепи, понеже господеви согрешиша. И огнем и яростию его поядена будет вся земля: занеже скончяние и потщание сотворит господь живущим на земле». Се убо пророческое речение мала зело от многих.
Слыши убо и еуангельская словеса подобна пророчбскым. От Матфеа: «Яко же молнии исходит от восток и является до запад, тако будет и пришествие сына человеческаго. Абие же по скорби дней тех солнце померкнет, луна не даст света своего, и звезды спадут с небесе, и силы небесныя подвигнутся. Тогда явится знамение сына человеческаго на небеси.