Страница 2 из 2
Егда мне бываютъ многи скорби от бЪсовъ и зълыхъ человЪкъ, многажды невидимо глаголюще: «Не бойся бЪсовъ — господь с тобою». Иногда же глаголюще: «В терпении стяжите души ваша». Многажды и от братий соловецкихъ и пребывающе со мною наносяще мнЪ скорби и не могущи терпЪти утешающе мя и невидимо глаголюще: «Вы бо силни есте и немощи немощныхъ носите».
И по многимъ временемъ многимъ симъ знамениемъ не вЪрующе ми, да некако прельщенъ буду от врага. И седящу ми въ келии при оконце и слышах гласъ от полуденныя страны, яко громъ от небеси, истязающе мя за невЪрие многимъ видениямъ явнымъ и в тонкомъ снЪ, и глаголюще сице: «О, роде невЪрный и развращенный, доколЪ буду с вами, доколЪ терплю вамъ!» И от гласа того страшнаго ужасеся душа моя и вострепета вся внутренняя моя зЪло.
Не в кое же время хотяще ми изыти от острова Анъзерскаго въ руския мЪста от стужения злыхъ человЪкъ и бЪсовъскихъ страстей, и видЪхъ знамение. Стоящу ми на поле чисте и показующе ми некто незнаемъ перстом на небо: «Зри». И видЪхъ чрезъ все небо лучю свЪтовидну, яко радуга во время дождевное. И, мало помедливъ, паки глаголюще: «Возри на небо». И видЪхъ образъ Христа бога нашего и пречистую богородицу, и святаго пророка Иоанна, с ними же дву анъгеловъ и апостоловъ, яко же въ ДЪисусЪ описуютъся. МнЪ жЪ чудящеся симъ знамениямъ. И паки показующе ми: «Зри на небо!» И видЪхъ нерукотворенный образъ Христа бога, тако бысть великъ во все небо. И глаголаше ми: «Виждь величество божие и славу его: егда Отчимъ изъволениемъ во чревЪ вмъстися в пресвятую богородицу и на земли многи скорби претерпЪ человЪкъ васъ ради бывъ, ныне же и небо не вмЪститъ. А ты не хощеши терпети скорби».
Некогда ми бдяще въ молитвах и совершающе Иисусовы молитвы, число и поклоны. Последи же нача призывати пречистую богородицу. Обычай имущи молитися: «Пресвятая госпоже Мария, пречистая богородица, спаси мя грЪшнаго!» И къ совЪршению сотни сотвори, является мнЪ пресвятая богородица, имуще на себЪ три звЪзды велми свЪтлы — на главЪ и на рамЪхъ, яко же описуютъ, имуще ризу багровидну. И глаголаше ми: «Елеазаръ, разумЪй на мнЪ звёзды сия. И аще имаши всегда мя тако призывати въ молитвахъ, буду тебе помогати до исхода души твоея». В то же время лежаще у мене труждающему — пришелъ из своея келии, угорелъ зимною порою. И приниче к нему, на него подула и глагола мнЪ: «ПобЪреги угорчака сего». И тако невидима бысть.
Въ день неделный, во святый постъ, видехъ святую богородицу на литургии умнымъ окомъ: стояща пред образом своим болшимъ от леваго крылоса, лицемъ на церковь. И нача мы на сходЪ пЪти оба крылоса стихъ «О тебе радуется обрадованная» задостойна. Она же двигнуся с того мЪста и ста посредЪ насъ с молчаниемъ, стояла до скончания стиха того. Мы же пропевше поклонишася по обычаю, она же тако же поклонися и невидима бысть. МнЪ же страхомъ и радостию объяту бывшу.
Во ино жъ время лЪтнЪе приидохъ въ церковь к обедни в день суботный поранЪе прежде братии и въ трапезЪ начало положихъ по обычаю. И является мнЪ образъ пречистыя богородицы подобие смоленския, держаще на руку лЪвою превечнаго младенца, господа нашего Иисуса Христа, яко же въ Соловецкомъ монастырЪ противъ игуменскаго места, имуще на себе ризу багровидну, златомъ часто испещренну. И глагола ми тако: «Елеазаръ, имейте заповеди христовы — смирение и любовь, да во имя мое поставите святую церковь». И невидима бысть.
По семъ является ми въ церкви пресвятыя Троицы во ино время во образе апостолъ христовъ Павелъ, держитъ въ правой руке знамение — образъ пядничной пресвятыя богородицы. И глаголаше мнЪ тако: «Елеазаръ, аще когда приходите во святую церковь, приходите и покланяйтеся образу Христа бога нашего со страхом и трепетомъ. Да сия глаголы моя и братии яви».
На другой же день в келию прииде ко мнЪ искуситель. Является мнЪ темъ же образом Павла апостола, токмо в рукахъ не имать образа. Мене же сохрани сила божия. Опознахъ чювствомъ приходъ его. И нача глаголати: «ВЪрую во единаго бога Отца!» И тако силою Христовою в той часъ исчезе.
НЪкогда ми прииде помышление: како сотворю угодно творцу и богу моему и что угодно ему моление? И востахъ помолихся прилЪжно: «Владыко, боже Отче и Сыне и святый Душе! Яви мнЪ, како тя призову на всяко время — псалмопениемъ или красною молитвою?» И слышахъ гласъ глаголющъ ко мнЪ:
«Симъ образомъ молися — глаголи на всякъ день: «Слава в вышныхъ богу и на земли миръ, въ человЪцехъ благоволение» до конца и: «Господи — прибежище бысть намъ» и: «Сподоби, господи, въ день сей и на другой день». Паки помолихся. И паки тоже повелЪваетъ глаголати. Се бо есть пЪснь къ богу обща ангелска и человЪческа.
Сие списано с писма преподобнаго Елеазара Анзерскаго, которое писмо на столпце на обороте написано въ заглави тако: «Писмо руки началника Анзерскаго скита, грЪшнаго старца Елезара». И оное писмо хранитца с протчими писмами въ полате со столпцами о трехъ склейкахъ, в верху четвертая не писана.