По толиких язвах и мучительствах Кровию Своею токмо, весь наг сый, одеян. Наг же сый, яко от рождения, от всех поругаем с велиим студом, пред всеми ризы Своя, особь далече от Себе поверженныя, едва жив собирая, и трясыйся от болезни и мраза, зима бо бяше, солнце и огнь в согреяние земнородным создавый, Господи Иисусе Христе, Сыне Божий, слава Тебе, слава Тебе! Сердце мое студное на добродетель согрей теплотою Пресвятаго Твоего сошедшаго во огни Духа, молюся Ти.

О столп каменный смертоносне, о землю же к смерти ударен, слава Тебе, Господи Иисусе Христе, Сыне Божий, слава Тебе! Столп крепости от лица вражия буди ми, молюся Ти.

Ногами ударен, за власы главные и за браду торган (рван) и влачим, Господи Иисусе Христе, Сыне Божий, слава Тебе, слава Тебе! Зубы геенскаго змия да не ята будет душа моя, в крове Твоем сохрани мя, молюся Ти.

Скверныма рукама богоубийственнаго рода жидовскаго, оружием и дрекольями даже до преткновения ударен в ноги и голени. За власы от земли был еси поднесен превозносимый неба и земли Царю, Господи Иисусе Христе, Сыне Божий, вопию Ти, слава Лебе, слава Тебе! Возвыси и вознеси ум мой, да всегда небесная помышляю и творю благоутробием Твоего человеколюбия, егоже ради страждеши.

От терноваго венца тысящу избодений претерпевый, тогда же капли Божественныя и бесценныя Крове из главы Твоея источивый; венец терновый возлагаем и низлагаем бяше на пречистую главу Твою, Главо Церкве прекрасная! Слава Тебе, Господи Иисусе Христе, Сыне Божий, слава Тебе!

По терновом венце во главу тростиями и палицами от всея крепости ударенный, и тем Твою честную главу и пресвятую глубочайше пронзоша терновыми остии, от них же остия в мозгу Твоем унзоша. Аз же унзен острым душеборных страстей тернием, тем вопию Ти: слава Тебе, Господи Иисусе Христе, Сыне Божий, слава Тебе!

На ругание от иудей, аки цареви данную трость приемый в десницу Твою, одесную Бога и Отца седяй, Господи Иисусе Христе, Сыне Божий, слава Тебе, слава Тебе! Тростию той заглади рукописание неизчетных согрешений моих, да стану одесную во славе Твоей и прославлю Тя вовеки.

Пястьми по Божественном Теле во уста и между очи, Его же очи яко пламень огненный, ударенный, Господи, по пресвятой же выи Твоей ударен, выю мою преклони, молюся Ти: укрепи мя в поклонение Тебе, нас ради преклоншему небеса и сошедшему. Господи Иисусе Христе, Сыне Божий, слава Тебе, слава Тебе; славы Твоея небесныя не отрини мене.

Во главу и перси ударение приемый, приими мое и главы приклонение, и усердное в перси биение, якоже иногда мытарство приял еси; укрепи же мя от Твоея пресвятыя десницы, да ударение и всяку печаль, и тяготу временную благодарно понесу; вся бо Ты, елика хощеши, на пользу строиши. Слава Тебе, Господи Иисусе Христе, Сыне Божий, слава Тебе; славы Твоея Божественныя удостой мя, молюся Ти.

За нос с поруганием и зельным мучением и за уши терзан и люте узявлен, от ногу до главы несть целости, ниже образа доброты имый, терновый венец нося, в багряницу поругания одеян, второе к Пилату приведен, иже видев Тя в неисцельных язвах и болезнех, удивися столь безчеловечному иудейскому суровству и рече о Тебе: сей Человек столь немилостиво избиен, достоин есть прочее милосердия от иудей; они же "распни" (Лк. 23, 21) вопияху нань. Вопию Ти и аз, Слове Божий: слава Тебе, Господи Иисусе Христе, Сыне Божий, слава Тебе! Терние грехов потреби от земли сердца моего окаяннаго, да плод принесу Ти благодарения.

Воду из камене и ветры от сокровищ Своих изводяй, приведен был еси к неразсудному Пилату, иже седе на судищи и Тебе, на Херувимех седящаго и судящаго живым и мертвым, осуди на смерть неповиннаго. Слава Тебе, Господи Иисусе Христе, Сыне Божий, слава Тебе, Боже мой; даждь ми всегда память имети смертную и готову быти на Суд Твой праведный и Страшный, на немже не осуди мя по делом моим, но спаси мя по милости Твоей, молюся Ти.

Егда Пилат возгласи на Тя смертное изречение, неизреченныя жизни Подателю, тогда иудеи, немилосердием связанные, связаше руце Твои и на выю Твою пресвятую возложиша Крест, и аки злодея между двема разбойники ведоша на смерть; со беззаконными вмененный, неизменный Господи Иисусе Христе, Сыне Божий, слава Тебе; от злодейства невидимого татя, подкапывающа различными искушении храмину души моея, во дни и в нощи сохрани мя яко зеницу ока, да не окраден буду сокровища вечных благ, яже уготовал еси любящим Тя, молюся Ти.

Еще же, милости бездно, немилостивый род еврейский возложи на Тя Крест зело тяжкий, егоже на Себе Самом несый, пал на землю, тогда же и ударения смертоносная приял еси, благоприятне Господи Иисусе Христе, Сыне Божий, слава Тебе, слава Тебе! Тех ради Твоих чудес Крестом падения вражия сохрани мя, молюся Ти.

Приведен был еси на Голгофскую гору горних Сил и Властей Владыка, Сам риз Своих извлекаем волею, болезнь претерпел еси; егда бо хитон Твой снята, тогда вся язвы растерзал и раздирая, болезнь Твою обновляша, обновивый естество человеческое, молюся Ти: ветхие струпы души моея беззаконных страстей, прилепшие ей, отъемши, приими мя, вопиюща: неизреченный во страдании Твоем, Господи Иисусе Христе, Сыне Божий, слава Тебе, слава Тебе, долготерпеливе Владыко!