И от того точию безумно кто мнится мудр быти, а еже мнится имеа, взято будеть от него; понеже не хощеть рещи «не вемы», яко же вси святии ведуще глаголаху: «Ничто же вемы». И аще где потаена суть и скровена от нас словеса в божественом писании, и се бог на множайшую ползу сотвори, яко да не множае осужени будем в разуме преступающе. Понеже иже сподобился есть разуму и не подвизается яко же прежний святии отцы наши в посте и молитвах и в целомудрии и со смирением, таковый, яко недостоин, с прещением изгонится от благодати святаго духа, яко Саул от царьства, рече святый Максим.

Мы же убо не тщеславие, но смиреномудрием разума снизившеся и многим трудом и молитвами желаемаго взыщем, прочтем единою и дващи и многащи, и ведомая удержи, неведомая же и неявленная многащи проиди. И аще не возможеши обрести искомаго, пойди к мудрейшим, прииди к учителю, яко же рече великий Златоуст. И аще видит тя бог толика имуща усердие, то и открыет ти всяко.

Велия бо стремнина и пропасть глубока писанием неведение и самосмышлением изъобретение. От сего убо и добрая зле приемлются, и на развращение простейших хитрости словес прелагаются, сие житие растленное введе, сие и ереси роди, сие и горьняа доле сотвори. От сего невидениа и ныне устремишася нецыи рещи: 7000 лет жити, а егда настанет осмая тысяща, тогда конец будет.

Аще и вся писаниа прочтеши, не обрящеши того, но, яко же рех, неведомо никому всемирное скончяние написаша. Аще ли же хощеши известнее уведати, прочти списание премудраго оного старца, иже книгу написа, глаголемую Зерцало. Тамо бо пишет о конце сице. «Душа: Ни рабыни моя не оставляй, но рци ми к сим мало о последних нынешняго века и о кончине его, когда и како и какова есть и когда антихрист приидет он; чаяние бо страшит мя и смущает.

Жадаю уведати истинное рабыни о сем, да некако, обрет ненаучену, прелстит мя льстец. Плоть: Иже откуду и како приидет се убо реку тебе; а еже когда, никако неведомо есть сие. Многажды о сем воспросиша Христа его же видеша апостоли и ученицы, но не рече им когда. Рече бо: Сице отвеща к ним глаголя: Никто же весть никако же оного дне, ни ангели самии, но отец мой един. И како же утаил есть он, аз скажу?

По домыслу убо реша мнози многая, госпоже. Неции убо мечташася от еже в шестих днех миру всему рече создатися и быти от бога вседетеля и зижителя всех, почи же в седмый, шестой убо тысящи прочее скончеваю щися быти скончянию общему и всяческому, понеже рече: Тысяща лет, яко день един от бога вменяются; нужа скончеваеме шестей тысящи рекше шестому дни, скончятися убо и самому миру и веку, еже в шестих днех бывшему, владычице моя. Солгаша же ти обаче яко же яве бысть.

Глаголют же паки друзии: Понеже есть седморичен настоящий век убо лепо есть ему довлети же и пребывати донде же седмая тысяща вся скончается, подобаеть убо седморичному веку в седмое скончятися число, яко Соломон рекл есть: даждь чясть убо седмым и тогда осмым, осмый же будущаго века образ носит. Но и се речение не благословно мнится мне. И инии паки присносущее и божественое сведетельство от откровенна Иоанна Богослова глаголют бо, яко в нем явьствено прорече, яко покланяем будет непорочный агнец тысяща лет, госпоже, Христа проявляа, но и зверь убо диавола глаголю связан будет тысяща лет, потом же разрешится, прельстит же люди многи от язык и евреи; яко по кресте Христа и бога моего и еже по во ад съшествии связан будет зверь[12] и тогда прочее начят чтом быти агнец и считаются оттоле тысяща лет, о душе!

Но ниже тии истинно рекоша, любимая: лет бо тысяща на неуставнем приемлются, яко же навыкох от многих, госпоже! Се бо от Христа даже до ныне скончяшася тысяща лет еще и сто и три над сим, даже до нынешняго лета: аще ли чтеши от погребениа его и страсти, бывают тысяща и 70 лет. И смотри ми число и разумееши, яже глаголю: отнеле же в начятце и солнце видеся на небеси суть лета вся съчитаема сице: 5000 еще же и 500, яже преидоша преже Христа, госпоже, и тако прииде воплотився от девы, 500 и 6 сот преидоша се и три другиа индикти, он же третей, круг луне десятый, солнцу же 23.

К сим же и друзии многа и яко же прилучися предрекоша умысливше о кончине века. Но да престану сиа! Не лепо бо есть та писати, яко ничтоже известно в сих изъобретая сущее бо васнь, а истинное никто же отнуд рекл есть. О чясе же убо и о дни оном прочее аз, госпоже моа, рещи Како возмогу, еже не возможе рещи когда кто от древних? Покоряю же ся Григорию Богослову вяще паче инех всех и речению его сице глаголющему: яко подобает наполнитися вышнему миру; Христос велит, и никто же ин; наполняет же ся от спасаемых святых же и праведных подвизающихся.

Сих всех душа совокупляются тамо и место оно и число наполнают, от него же спаде зле, иже иногда денница и с всем воиньством и множеством ангельским, их же возможе злейшии привлещи с собою. Внегда убо наполнятся число онех, ожидай скончяниа настоящаго века». Познай, брате[13] яко святый старец той, иже сиа написавый, бяше в лето шесть тысящное шесть сот третее — отселе за четыреста лет.

Зри, яко и в тех летех глаголаху нецыи самосмышлением, яко егда седмая тысяща скончяется, тогда будет всемирный конец! Премудрый же он старец не прият сего во сведетельство, но и отрече: понеже не рече сего кто от святых апостол или святых и богонОсных отец наших, но нецыи, рече, по домыслу рекоша, сиречь мнением. Аще ли же инии приводят на сведетельство еже в мясопустном Синоксари написал Никифор Ксанфопул, той бо рече: «Глаголет же ся. яко по седми тысящ лет будеть приход». Виж, что рече?

Яко «глаголет же ся», а не вемы, кто глаголет! Не убо рече, яко глаголет пророк, или апостол, или кто от прочих святых: обычяй бо есть божественному писанию глаголати тако о неведомых вещех. Сие убо речение ничто же имат известно, но яко же о Адаме речено есть: «Глаголет же ся, яко сотвори Адам сто лет, инии же рекоша 40 день, инии же рекоша 6 чясов, а истину никто же весть разве единого бога».

Безсловесно убо есть, еже приводити на сведетельство неведомыя вещи! Но что ради сиа вся проидохом? Но яко да покажем, яко еже бог не повеле ведати сего, аще и тмами трудимся, ищуще и испытающе, не возможем уведати, но точию на свою главу огнь събираем. Яко бог рече: «Ни ангелом возможно есть ведати»; мы же, человецы, грешни суще и всегда сквернящеся, яко же свиниа в кале тимениа, и хощем уведати, еже бог не повеле!

Яко же в том же Синоксари глаголет, яко еже господь и апостолом не сказа, мы како хощем ведати? Аще ли же нецыи глаголют, яко пасхалиа написана на 7000 лет того деля, что седмь тысящ лет жити, ино, брате, буди ти ведомо, что не на седмь тысящь лет сложена пасхалиа, но, яко же пишут историческая словеса, от вознесениа господа нашего Иисуса Христа до перваго собора святых отец 300 и 18 лет, иже бысть в лета благочестиваго царя Констян тина, даже дотоле пасхалии не было, и яко же о пасце не взаконено бяше, но во всем году творяху пасху: егда кто хотяше пасху сотворити, пощашеся дней 40, тогда пасху творяше, и нестройна сиа и мятежна бываху.