Но ниже тии истинно рекоша, любимая: лет бо тысяща на неуставнем приемлются, яко же навыкох от многих, госпоже! Се бо от Христа даже до ныне скончяшася тысяща лет еще и сто и три над сим, даже до нынешняго лета: аще ли чтеши от погребениа его и страсти, бывают тысяща и 70 лет. И смотри ми число и разумееши, яже глаголю: отнеле же в начятце и солнце видеся на небеси суть лета вся съчитаема сице: 5000 еще же и 500, яже преидоша преже Христа, госпоже, и тако прииде воплотився от девы, 500 и 6 сот преидоша се и три другиа индикти, он же третей, круг луне десятый, солнцу же 23.

К сим же и друзии многа и яко же прилучися предрекоша умысливше о кончине века. Но да престану сиа! Не лепо бо есть та писати, яко ничтоже известно в сих изъобретая сущее бо васнь, а истинное никто же отнуд рекл есть. О чясе же убо и о дни оном прочее аз, госпоже моа, рещи Како возмогу, еже не возможе рещи когда кто от древних? Покоряю же ся Григорию Богослову вяще паче инех всех и речению его сице глаголющему: яко подобает наполнитися вышнему миру; Христос велит, и никто же ин; наполняет же ся от спасаемых святых же и праведных подвизающихся.

Сих всех душа совокупляются тамо и место оно и число наполнают, от него же спаде зле, иже иногда денница и с всем воиньством и множеством ангельским, их же возможе злейшии привлещи с собою. Внегда убо наполнятся число онех, ожидай скончяниа настоящаго века». Познай, брате[13] яко святый старец той, иже сиа написавый, бяше в лето шесть тысящное шесть сот третее — отселе за четыреста лет.

Зри, яко и в тех летех глаголаху нецыи самосмышлением, яко егда седмая тысяща скончяется, тогда будет всемирный конец! Премудрый же он старец не прият сего во сведетельство, но и отрече: понеже не рече сего кто от святых апостол или святых и богонОсных отец наших, но нецыи, рече, по домыслу рекоша, сиречь мнением. Аще ли же инии приводят на сведетельство еже в мясопустном Синоксари написал Никифор Ксанфопул, той бо рече: «Глаголет же ся. яко по седми тысящ лет будеть приход». Виж, что рече?

Яко «глаголет же ся», а не вемы, кто глаголет! Не убо рече, яко глаголет пророк, или апостол, или кто от прочих святых: обычяй бо есть божественному писанию глаголати тако о неведомых вещех. Сие убо речение ничто же имат известно, но яко же о Адаме речено есть: «Глаголет же ся, яко сотвори Адам сто лет, инии же рекоша 40 день, инии же рекоша 6 чясов, а истину никто же весть разве единого бога».

Безсловесно убо есть, еже приводити на сведетельство неведомыя вещи! Но что ради сиа вся проидохом? Но яко да покажем, яко еже бог не повеле ведати сего, аще и тмами трудимся, ищуще и испытающе, не возможем уведати, но точию на свою главу огнь събираем. Яко бог рече: «Ни ангелом возможно есть ведати»; мы же, человецы, грешни суще и всегда сквернящеся, яко же свиниа в кале тимениа, и хощем уведати, еже бог не повеле!

Яко же в том же Синоксари глаголет, яко еже господь и апостолом не сказа, мы како хощем ведати? Аще ли же нецыи глаголют, яко пасхалиа написана на 7000 лет того деля, что седмь тысящ лет жити, ино, брате, буди ти ведомо, что не на седмь тысящь лет сложена пасхалиа, но, яко же пишут историческая словеса, от вознесениа господа нашего Иисуса Христа до перваго собора святых отец 300 и 18 лет, иже бысть в лета благочестиваго царя Констян тина, даже дотоле пасхалии не было, и яко же о пасце не взаконено бяше, но во всем году творяху пасху: егда кто хотяше пасху сотворити, пощашеся дней 40, тогда пасху творяше, и нестройна сиа и мятежна бываху.

Тогда сиа святии отци 300 и 18 многая церковная исправлениа и благочинна сотвориша, и раздельшееся на многиа чясти церковное тело христовою благодатию во едино съчеташа быти, и еже о бозе соединение в свет произыде, яко не к тому раздвоению коему или съмнению о вере быти. Тогда и о пасце, господа нашего Иисуса Христа воскресении, бывшу взысканию. Изволися благочестивому царю Констянтину и всем святым отцем, еже во един день всем пасху повсюду сотворяти, где аще кто будет.

Тогда святии отцы написаша миротворный великий круг да границу; круг же он сотвориша на 500 лет и 30 и 2. И тако круг той обращается, яко же лунный круг и солнечный и индикта, и скончяниа не имать. Ино не всякому мощно того круга знати, и кто знает его известно, и они написали с того круга плохую пасхалию до шеститысящного лета. Тако убо нецыи мнеша: понеже в шестих днех миру всему создатися от бога вседержителя, почи же в седмый, шестой убо тысящи скончевающися быти скончянию общему и всяческому. Но сие преиде и не бысть по домыслу их.

И абие начяша мнети, яко тысяща лет по Христове воскресении до антихристова царьствиа, и сведетельство приводяще, еже великий Иоанн Богослов рече, яко связан будет зверь, сиречь диавол, тысящу лет, и изложиша пасхалию до толе. Но ниже тии истину рекоша: лет бо тысяща на неуставном приемлется. Абие нецыи начяшася домышляти, яко седморичен есть век сей настоящий; убо лепо есть ему довлети и пребывати, дондеже седмая тысяща вся накончяется, и абие изложиша пасхалию до седмь тысящного лета.

Сиа убо собою умысливше нецыи, а не от святых апостол, ниже от богоносных отец наших и учителей, ниже от святых седми собор вселеньских кто известно сказа или изъобрете. Сего ради сиа слаба и не крепка. Не лепо бо есть о тех писати, иже не имут сведетельства от божественых писаний. Ныне же о сем речем пасхалью же елико кто написал, а известие имели все от миротворнаго круга.

Потом же святии отцы законоположиша и уставиша святцы на весь год; тогда нецыи разведоша границу и написаша в ней святцы и нарекоша ю скару. Нецыи же многиа мудрости изъобретше и многие круги и руки написаша. Но начяло всем им миротворный круг.[14] Аще бы на седмь тысящь лет сложена пасхалиа святыми отцы, то в седмътысящное лето скончялся бы миротворный круг: ныне еще осмьдесят лет и четыре уйде миротворнаго круга, а лето седмь тысящное скончялося. И сиа убо о сих.

Сказание о глаголющих, что ради несть втораго пришествиа Христова долго, а уже время ему быти: святии бо апостоли писали, яко Христос родися в последняа лета, и уже тысяща и пятьсот лет преиде по Христове рожестве, а втораго его пришествия несть. [15]Иже сице глаголют, не ведет еже глаголют ни от них же утвержаются[15]. Иже тако глаголющий, явьетвене показаша неистовство и изумление непрощенно и новейший нечестна образ и гордости и неверна знамение.

Аще быша со смиреномудрием веру имели, приимали быша реченная в божественом писании: «Яже убо бог совеща, кто разорит, и руку его высокую кто отвратит?», и не смели бы много веществовати умолъчянная и истязати покровенная. Егда же кто от гордости и неверна победится, бывает яко же конь узду изложив и всадника низверг от себе, зелнейши ветра обносится и на вся злобная течет места, дондеже в погибелную пропасть низринется, яко же ныне глаголют неции развращенна и полагают претыканиа братии в соблазн, еже божествении апостоли святым духом написаша всем верующим на ползу.