Тогда сиа святии отци 300 и 18 многая церковная исправлениа и благочинна сотвориша, и раздельшееся на многиа чясти церковное тело христовою благодатию во едино съчеташа быти, и еже о бозе соединение в свет произыде, яко не к тому раздвоению коему или съмнению о вере быти. Тогда и о пасце, господа нашего Иисуса Христа воскресении, бывшу взысканию. Изволися благочестивому царю Констянтину и всем святым отцем, еже во един день всем пасху повсюду сотворяти, где аще кто будет.

Тогда святии отцы написаша миротворный великий круг да границу; круг же он сотвориша на 500 лет и 30 и 2. И тако круг той обращается, яко же лунный круг и солнечный и индикта, и скончяниа не имать. Ино не всякому мощно того круга знати, и кто знает его известно, и они написали с того круга плохую пасхалию до шеститысящного лета. Тако убо нецыи мнеша: понеже в шестих днех миру всему создатися от бога вседержителя, почи же в седмый, шестой убо тысящи скончевающися быти скончянию общему и всяческому. Но сие преиде и не бысть по домыслу их.

И абие начяша мнети, яко тысяща лет по Христове воскресении до антихристова царьствиа, и сведетельство приводяще, еже великий Иоанн Богослов рече, яко связан будет зверь, сиречь диавол, тысящу лет, и изложиша пасхалию до толе. Но ниже тии истину рекоша: лет бо тысяща на неуставном приемлется. Абие нецыи начяшася домышляти, яко седморичен есть век сей настоящий; убо лепо есть ему довлети и пребывати, дондеже седмая тысяща вся накончяется, и абие изложиша пасхалию до седмь тысящного лета.

Сиа убо собою умысливше нецыи, а не от святых апостол, ниже от богоносных отец наших и учителей, ниже от святых седми собор вселеньских кто известно сказа или изъобрете. Сего ради сиа слаба и не крепка. Не лепо бо есть о тех писати, иже не имут сведетельства от божественых писаний. Ныне же о сем речем пасхалью же елико кто написал, а известие имели все от миротворнаго круга.

Потом же святии отцы законоположиша и уставиша святцы на весь год; тогда нецыи разведоша границу и написаша в ней святцы и нарекоша ю скару. Нецыи же многиа мудрости изъобретше и многие круги и руки написаша. Но начяло всем им миротворный круг.[14] Аще бы на седмь тысящь лет сложена пасхалиа святыми отцы, то в седмътысящное лето скончялся бы миротворный круг: ныне еще осмьдесят лет и четыре уйде миротворнаго круга, а лето седмь тысящное скончялося. И сиа убо о сих.

Сказание о глаголющих, что ради несть втораго пришествиа Христова долго, а уже время ему быти: святии бо апостоли писали, яко Христос родися в последняа лета, и уже тысяща и пятьсот лет преиде по Христове рожестве, а втораго его пришествия несть. [15]Иже сице глаголют, не ведет еже глаголют ни от них же утвержаются[15]. Иже тако глаголющий, явьетвене показаша неистовство и изумление непрощенно и новейший нечестна образ и гордости и неверна знамение.

Аще быша со смиреномудрием веру имели, приимали быша реченная в божественом писании: «Яже убо бог совеща, кто разорит, и руку его высокую кто отвратит?», и не смели бы много веществовати умолъчянная и истязати покровенная. Егда же кто от гордости и неверна победится, бывает яко же конь узду изложив и всадника низверг от себе, зелнейши ветра обносится и на вся злобная течет места, дондеже в погибелную пропасть низринется, яко же ныне глаголют неции развращенна и полагают претыканиа братии в соблазн, еже божествении апостоли святым духом написаша всем верующим на ползу.

Ибо святый апостол Петр сице рече о господе нашем Иисусе Христе: «Проразумеваема убо преже сложениа миру, явльша же ся в последняа лета вас ради». И паки той же рече: «Иже силою божиею соблюденых верою во спасение готово явитися во время последнее, о нем же радуйтеся». Великий же апостол Павел сице глаголет: «Егда прииде кончина лету, посла бог сына своего, рожающагося от жены»; и паки той же рече: «Ныне же единою, в кончине век, в отметание греху жертвою своею явися».

Сиа убо прочетше и протолковаша развращение к своей им погибели. Того ради нас учя и утвержая, сих же загражая безстудная уста, верховный и великий апостол Петр явьственейши всех о сем святым духом вопиет: «Свойствено бо есть святому духу вся ведати и глубины божиа и хотящая быти, яко настоящая, своим рабом открывати». Рече убо: «Возлюблении, се преже ведуще, яко в последняа дни приидут ругателе, по своих похотех ходяще и глаголюще: Где есть обетование пришествиа его?

Отнели бо отци успоша, вся тако пребывают от начяла созданию! И утаит бо ся им, сие хотящим, яко небеса быша исперва и земля от воды и водою составлена божиим словом, ими же тогдашний мир водою потоплен погибе. А нынешняа небеса и земля тем же словом скровена суть, огнем блюдом а в день суда погибель нечестивым человеком. Едино[16] же се да не утаится вам, возлюблении, яко един день от господа, яко тысяща лет, и тысяща лет, яко[17] един день.

И не коснит господь обетованиа, яко же нецыи коснение мнят, но долготерпит на нас, не хотя некиа погубити, но вся в покаяние вместити». Слышал ли еси великаго и верховнаго апостола Петра, велегласнейши трубы тогда вопиюща о хотящих ныне быти? Аще ли же тебе некая словеса неудобь разумна суть о сих, слыши сказание сих. Рече бо, яко «в последняа дни приидуть ругатели»,— по истине рекл есть великий апостол Петр, яко ругатели суть тако глаголющий, яко ругаются божественому промыслу, яко судбы божиа неиспытанныа хотят испытати.

Потом же глаголет: «По своих похотех ходяще», — от похотей бо и от растленна житиа и ереси составишася; человецы бо егда на похоти уклонятся, тогда оставляеми бывают от бога, яко же реченно есть — «не имать пребыти дух мой в человецех сих, понеже суть плоть». Сего ради глаголють: «Где есть обетование пришествиа его?». Сиречь — се обещался есть приити, сам бо рекл есть: «Яко молнии[18] исходит от восток и является до запад, тако будет и пришествие сына человеческаго»; и сеуже тысяща и 500 лет преиде, а втораго пришествиа несть, а уже время ему быти.

И паки глаголют: «Отнели бо отцы успоша, вся тако пребывают»,— сиречь: и при отцех наших тако глаголаху, но ничтоже збысться, яко же они вещаху, но вся тако пребывают. «От начяла созданию», — сиречь отнелиже создася мир сей, вся недвижима пребывают сице глаголющии суть, иже не веруют, яко есть бог, и яко строит промыслом своим и силою, и яко всем судит и воздаст комуждо по делом его.

Сего ради рече: «Утаит бо ся им, сие хотящим», — по истине достойна и праведне утаится от них, яко недостойным божественаго откровенна, яко же содетеля всяческих и творца многоплетенными козньми тщатся истязати. Се же им случается, яко не боголюбезною совестию ищут благочестиа, но величавою мыслию некасаемых касаются. Потом же рече: «Яко небеса бяше исперва и земля от воды и водою составлена божиим словом», — божественое бо писание глаголет «небо небесное» и «небеса небесная», и божественый Павел до третьяго небеси восхищен бысть.