Ибо святый апостол Петр сице рече о господе нашем Иисусе Христе: «Проразумеваема убо преже сложениа миру, явльша же ся в последняа лета вас ради». И паки той же рече: «Иже силою божиею соблюденых верою во спасение готово явитися во время последнее, о нем же радуйтеся». Великий же апостол Павел сице глаголет: «Егда прииде кончина лету, посла бог сына своего, рожающагося от жены»; и паки той же рече: «Ныне же единою, в кончине век, в отметание греху жертвою своею явися».

Сиа убо прочетше и протолковаша развращение к своей им погибели. Того ради нас учя и утвержая, сих же загражая безстудная уста, верховный и великий апостол Петр явьственейши всех о сем святым духом вопиет: «Свойствено бо есть святому духу вся ведати и глубины божиа и хотящая быти, яко настоящая, своим рабом открывати». Рече убо: «Возлюблении, се преже ведуще, яко в последняа дни приидут ругателе, по своих похотех ходяще и глаголюще: Где есть обетование пришествиа его?

Отнели бо отци успоша, вся тако пребывают от начяла созданию! И утаит бо ся им, сие хотящим, яко небеса быша исперва и земля от воды и водою составлена божиим словом, ими же тогдашний мир водою потоплен погибе. А нынешняа небеса и земля тем же словом скровена суть, огнем блюдом а в день суда погибель нечестивым человеком. Едино[16] же се да не утаится вам, возлюблении, яко един день от господа, яко тысяща лет, и тысяща лет, яко[17] един день.

И не коснит господь обетованиа, яко же нецыи коснение мнят, но долготерпит на нас, не хотя некиа погубити, но вся в покаяние вместити». Слышал ли еси великаго и верховнаго апостола Петра, велегласнейши трубы тогда вопиюща о хотящих ныне быти? Аще ли же тебе некая словеса неудобь разумна суть о сих, слыши сказание сих. Рече бо, яко «в последняа дни приидуть ругатели»,— по истине рекл есть великий апостол Петр, яко ругатели суть тако глаголющий, яко ругаются божественому промыслу, яко судбы божиа неиспытанныа хотят испытати.

Потом же глаголет: «По своих похотех ходяще», — от похотей бо и от растленна житиа и ереси составишася; человецы бо егда на похоти уклонятся, тогда оставляеми бывают от бога, яко же реченно есть — «не имать пребыти дух мой в человецех сих, понеже суть плоть». Сего ради глаголють: «Где есть обетование пришествиа его?». Сиречь — се обещался есть приити, сам бо рекл есть: «Яко молнии[18] исходит от восток и является до запад, тако будет и пришествие сына человеческаго»; и сеуже тысяща и 500 лет преиде, а втораго пришествиа несть, а уже время ему быти.

И паки глаголют: «Отнели бо отцы успоша, вся тако пребывают»,— сиречь: и при отцех наших тако глаголаху, но ничтоже збысться, яко же они вещаху, но вся тако пребывают. «От начяла созданию», — сиречь отнелиже создася мир сей, вся недвижима пребывают сице глаголющии суть, иже не веруют, яко есть бог, и яко строит промыслом своим и силою, и яко всем судит и воздаст комуждо по делом его.

Сего ради рече: «Утаит бо ся им, сие хотящим», — по истине достойна и праведне утаится от них, яко недостойным божественаго откровенна, яко же содетеля всяческих и творца многоплетенными козньми тщатся истязати. Се же им случается, яко не боголюбезною совестию ищут благочестиа, но величавою мыслию некасаемых касаются. Потом же рече: «Яко небеса бяше исперва и земля от воды и водою составлена божиим словом», — божественое бо писание глаголет «небо небесное» и «небеса небесная», и божественый Павел до третьяго небеси восхищен бысть.

Сего ради рече: «Небеса беша», а не едино небо исперва, а еже «от воды», Моисеови убо глаголющу: «И нарече бог твердь небо», ему же повеле посреде воды быти, и повелев разлучяти посреде воды, еже над твердию, и посреде воды, еже под твердию. А еже рече: «И земля от воды и водою составлена», яко же блаженный Давид рече: «Утвержьшему землю на водах», и паки рече: «Той на морих основал ю есть».

А еже рече: «Божиим словом», сим затвори вся помышлениа человеческая и вопросы, еже о сих хотящих уведати. Яко же рече писание: «Не весть человек путей божиих, величество бо его конца не имать, и разум его числа не весть, мир его превосходит всяк ум, мудрость же откуду обрете, и кое место хитрости[19] его?». Добре убо рече блаженный Давид, яко: «Той рече — и быша, той повеле — и создашася».

Пакы рече: «Ими же тогдашний мир, водою потоплен быв, погибе». Что есть тогдашний мир? Человеци, иже при Нои водою потоплени быша; еже предаст им бог на пищу и на питие и на иные многие потребы, тою же водою нечестивыя погуби. Добре блаженный Петр помяну тогдашний мир, иже при Нои, и тогда бо не вероваша Ноеви вопиющу: «Покайтеся»; аще бо быша уверилися, яко будет потоп, покаялися быша и от злых дел своих престали; но обаче не вероваша и неверьствиа ради погибоша.

Якоже и ныне глаголют, яко апостольское списание солгалося: понеже, рекоша, в последняа лета пришел есть Христос, а ныне тысяща и пятьсот лет преидоша, а втораго пришествиа несть долго. А еже рече: «Нынешняа же небеса и земля тем жесловом скровена суть», — сиречь нынешняа небеса и земля тем же словом божиим содержима суть, да не погубят нечестивых, яко же преже при Нои, от небес водою и от земля водою, или яко же содомляны от небес огнем и жупелом и горящим камением.

Пакы рече: «Огнем блюдома», — сиречь солнцем и луною и звездами просвещаема: ибо солнце и луну и звезды божественая писаниа огнь наричют. И паки глаголет: «В день суда и погибель нечестивым человеком», — сиречь огнем ныне вся просвещает, потом же огнем имать мучити нечестивых. «В день же суда» рече, являеть, яко аще и ныне не мучит нечестивых, но в день суда не убежать мучениа.

И пакы рече: «Едино же се да не утаится вам, возлюбленнии, яко един день от господа, яко тысяща лет», — сиречь: бог на небесех тысящами лет не чтет, бог нощию не объемлется; еда солнце восходит или заходить у него, или луна величится и малится, но всегда есть у него един день. Яко же рече Исайа пророк: «Не будеть солнце в свет дневный, ниже луна в просвещение нощи».

Того ради рече великий апостол Петр, яко един день от господа яко тысяща лет. Сему подобно и святый Давид глаголет, яко «лучши день един в дворех твоих, паче тысящ». По том же глаголеть: «И тысяща лет, яко день един», яко сие речение подобно есть, яко же глаголет святый Давид, яко «тысяща лет пред очима твоима, господи, яко день вчерашний, иже мимо иде, и стража нощная». Яко же рече тебе!