День вчерашний, иже проиде, мал есть и ни в что же сущи вменится, понеже уже мимо иде: тако пред богом тысяща лет. И не токмо рече: «Тысяща лет пред богом, яко день вчерашний», но и «стража нощнаа», сиречь три чясы, еже есть стража нощная. И ты глаголеши, яко тысяща и 500 лет преиде, отнели же Христос воплотися, и долго втораго пришествиа Христова несть!

Ибо писаниа рекоша: «Человеческий живот худ и мал, исполнь скорбей и болезни»; тысяща же лет много и велико время, и никто же поживе от человек тысящу лет. Или мниши, яко и богу. тысяща лет много и велико время, яко же нам, или бог Старостин) изнемогает, или нужи подлежит, яко же мы? Еда не слышиши Исаию, вопиюще о нем: «Бог вечный не трудится, ни взалчет, ни вжажет, ниже есть изъобретениа премудрости его»?

Паки рече: «Не коснит господь обетованиа, яко же нецыи коснение мнят», — сиречь: не того ради еще не[20] прииде господь судити, яко закоснел есть, но сего ради не прииде, рече, яко «долготерпит на нас, не хотя некиа погубити, но вся в покаяние вместити». И паки глаголет блаженный апостол Петр: «И господа нашего Иисуса Христа долготерпение спасение непщуйте, яко же возлюбленный нашь брат Павел, по данней ему премудрости, написа, яко же и во всех своих посланиих, глаголя в них о сих, в них же суть неудобьразумна некая, яже не на учении и не утверженнии развращают, яко же и прочая писаниа, к своей им погибели».

И святый апостол Павел вопиет: «В последняа дни настанут времена люта, будут бо человецы продерзливи, возносливи, сластолюбцы паче, нежели боголюбцы, имуще образ благочестиа, силы же его отвергъшеся. И сих отвращайся!». И паки рече: «От вас самех въстанут мужие глаголюще развращенная». И блаженный апостол Июда, брат Иаковль, сице глаголет: «Возлюбленнии, поминайте глаголы прежереченныя от апостол господа нашего Иисуса Христа, яко же глаголаху вам, яко в последнее время придут ругателе!

Си суть отделяюще себе, душевни, духа не имуще. Вы же, возлюблении, преже ведуще, хранитеся, да не нечистыми лестми сведени бывше, отпадете своего утвержениа». Се убо божествении апостоли о нашем спасении таково попечение имеют! Мы уже, страстнии и окаяннии, како смеем глаголати: «Что ради бог сие не сотвори тако, яко же мнится нам?». И толико помрачени быхом своею злобою, яко за многое милосердие истязуем благодетеля и за великое владыки человеколюбие досажаем ему и глаголем: «Почто укоснел есть судити?

И что ради несть долго втораго его пришествиа, [21] а уже время ему быти?[21]. О, безместнаго сего и лукаваго злонравна, и помрачениа и гордости, паче же рещи умнаго развращенна, и мыслей благих оставление и божиа промысла отвращение, и бесовьскаго богоборьства[22 ]изъобретение! Внегда убо бес души преодолеет растленным житием и гнусным неверьствием умный свет превратит: к тому несть в окаянном оном ни трезвенна, ни разсужениа, ни познаваниа, ни срама, но нечювьствие и омрачение и неверьствие и сумнение и о судбах божиих неизреченных испытание.

Яко же рече божественый Иоанн Лествичник: «Люто, еже о судбах божиих глубины испытати! В корабле бо гордости испытливии плавают; от того же чювьство яро и еже хотети в всем волю свою составити, еже бо претися в словесех, и запрещати нагло, и помыслы блуда за возношение их попущаемые на них, и мысль буя исполнь смеха, паче же реши плачя, и дух ужаса, от него же бывают тмы искушениа и помыслом развращение.

От сего убо и еже божественому писанию развращеное[23] толкование к своей и иных погибели; от сего бесчиние же и нелепота, на воздусе громи, на земле же труси, в мори же потоплениа, в градех же и в домех брани, в душах же греси, в царствах же истощаниа, еже не праве приимати божественаа писаниа! Что бо есть украшающи поднебесную, разве чин церковный, [24]иже божественым писанием украшаем и утвержаем [24]. То бо содержит небесная и земная».

Яко же рече великий Златоуст: «Оружия же от бога[25] дана суть, божественая писаниа духовьная; но аще не вемы составити оружиа, ничто же ползуемся от оружиа. Аще убо кто приимет оружье и бронями убо обвиет нозе, шлем же на лице положит, щит же к ногам привесит, мечем же стреляти начнеть, луком же сещи, убо может ли что оружием сим ползоватися? Яве есть всякому, яко и повредится не от немощи оружиа, но от неискусьства неведящаго сих держати добре.

Сице и в писаниих: аще чин их смятем, писание убо свою силу имут; нас же ничтоже пользуют». Яко же ныне нецыи божественая писаниа святых апостол прочетше, еже они святым духом написаша, еже господа нашего Иисуса Христа явльшася в последняя лета, они же развратившеся, глаголют: «Втораго пришествиа долго несть, а уже время ему быти!». Оле бесовскаго прелщениа и дерзости безчеловечьныя!

Се бо и невеществении и присносущнии небеснии уми не смеют испытоватй, но о всем повинуются и без испытаниа славят! И пророк Моисей вопиет: «Не искусиши господа бога твоего!». И господь вещает к своим учеником: «Несть ваше разумети времена и лета, яже отец положи своею областию». И премудрости глаголющи: «Вышьших тебе не ищи, и глубочяйших тебе не пытай; яже ти повелело есть, сиа сматряй».

И паки глаголет: «Не противися промыслу божию, ниже приступи[26] к нему сердцем двоичным, и не буди, яко же человек искушаяй господа». И апостол Павел глаголет: «Тем же убо безъответен еси, о человече! И яко ты избежиши ли суда божиа, или о богатьстве благости его и пождании и долготерпении не радиши, неведый, яко благость божиа на покаяние тя ведет?

По жесточьству же твоему и непокаянному сердцу, щадиши себе гнев в день гнева и откровенна праведнаго суда божиа, иже воздаст комуждо по делом его». И паки рече: «Дней сматряете и месяца и времена и лета! Боюся вас, еда како без ума трудихся в вас; будите яко аз». Почто рече премудрый Павел: «Будете яко аз»? Он бо к безмерней пучине премудрости божиа недоумевся, и глубину велию видев, велми возопи, глаголя: «О, глубина богатства и премудрости и разума божиа! Яко неиспытанкь. судбы его и неизъследованни путие его!

Кто бо разуме ум господень, или кто советник ему бысть?». Мы же, персть и прах, плоть и кровь, трава и цвет травный, сень и дым и суета, и еже аще что и хужьши сих, хощем неиспытанная испытати, яже бог не повелел есть! Сам бо господь нашь Иисус Христос рекл есть: «Ни аггели небеснии ведять, токмо отець мой един», а ты глаголеши: «Долго несть втораго пришествиа, а уже время ему быти!».