Видиши ли яко премудре яви[1] и полезно скры? Но егда убо вопрошен бысть от священных его ученик и апостол о скончянии всемирном, сице рече: Еуангелие: «О дни же том и чясе никто же весть, ни ангели небеснии, ни сын, токмо отец мой един. Блюдете, бдите и молитеся: не весте бо когда время будет!». Толкование Златоустаго: «Учит зде ученики не искати превосходящая человеческий разум: рек бо, яко ни ангели — возбраняет им не уведети ныне, его же ни ангели ведят; рек же яко отец един весть — возбраняеть им ни потом не искати уведети; приложи же ни сын весть — яко да не стужают си ученицы, яко не сказа им.

И не полезно нам ведати, когда кончина будет когождо или соборное скончяние, да присно подвизаемся чяюще его. Аще бо ныне, не вемы ни своея кончины, ни соборныя, друг друга снедаем и блуды и прелюбодействы и разбои и татбами и всеми делы сатаниньскими исполнени есмы, что не быхом сотворили, зло, аще быхом ведали конец, но все время живота своего во гресех изживше, таче во един день покаятися хотехом!».

Еуангелие: «Яко же во дни Ноевы, тако будет и пришествие сына человескаго: яко же бяху в дни преже потопа ядуще и пиюще, женящеся и посягающе». Толкование Златоустаго: «На уверение неложным его словесем приводит сказание бывъшаго потопа в дни Ноевы. Яко же бо тогда ругахуся составлению ковчега, Ноеви убо всегда въпиющу: покайтеся, они же смеющеся ругахуся, дондеже приде вода и погуби всех.

Тако и ныне нецыи ругаются о словесех кончины. Объявляет же ся, яко антихристу приходящу сласти похотныя умножатся в человецех и на питаниа и на блуды безсрамно уклонятся, яко же при Нои исполины[2]». И паки подобно сему и святый апостол Петр глаголет: «Приидет же день господень, яко тать в нощи». К великому же Иоанну богослову сам глаголеть в откровении: «Се гряду яко тать».

И великий апостол Лука глаголет в деяниих: «Ови же убо съшедшеся вопрошаху его, глаголюще: Господи, аще в лето се устраяеши царствие Израилево? Он же рече к ним: несть ваше разумети времена и лета, еже отец положи своею областию». Аще убо апостолом не повеле о сем испытовати, к ним же сам рече: «Вы есте миру и божественаго духа исполнь суще», колми паче нам, иже многих страстей исполнь сущем и всегда богови согрешающим, не подобает пытати, их же бог не повеле.

И многа такова в божественом писании обрящеши о сем, яко богу съпротивно есть и отнудь отреченно, еже божиа судбы опытывати. А иже глаголют яко святии отцы написали, что седмь тысящь лет здешняго житиа, а осмая тысяща будущаго века, а ныне седмь тысящь прошло, а конца несть, ино и святии деи отцы солгали[3]; иже глаголют тако, яко святии отцы солгали, то ти суть уста отца их сатаны, яко не хотяще потрудитися в ширине божественаго писаниа и поискати в нем божественаго духа скровенных тайн и дерзают рещи, яко святии отцы солгали.

Еже убо святии и божествении отцы наши и учитилие любомудръствоваша и предаша нам от иных многих, им же несть числа, и глаголаша и научиша вся согласна пророческому и еуангельскому и апостольскому учению сказаша и написаша. И ныне тако же и о сем написаша согласно пророческим речем. Рече бо премудрый Соломон: «Дай же часть убо седмым, то тогда осмым».

Сему согласуют вси святии отцы наши и учитилие. Рече убо негде в божественых писаниих его великий Василие: «Земля убо наше смешение, и земля покрывает сего паки, и земля паки возстание: ибо сугубая десяторица погибе под седмей, осмая же будущаго века воображает растворение». Богослов же Григорие глаголет, яко даяти чясть седмым и убо осмым, яко же нецыи преже нас соломонское восприаша.

Инде той же рече: «Еже и божественый Соломон приказывати мнит ми ся даяти чясть седмым жизни сея и убо осмым будущему от здешняго благодейства, иже тамо устроение». Великий же Златоуст сице рече: «Ибо в осмый век хотяше быти мертвым воскресение и к тому смертию непресечено будет, но не разрушимо будет и вечно». Святый же Иоанн Дамаскин глаголет сице: «Глаголет же ся убо сего мира седморичен век, рекше от небеснаго и земнаго сотворениа, даже и до общаго человеком востаниа.

Есть бо скончяние особно, своя комуждо смерть, есть же и общее всему скончяние, егда приидет быти обыцему человеком востанию, осмый же век приходяй». Премудрый же Максим Исповедник рече, яко господь во осмом дни являющася, сиречь в пришествие его и праведным[4] убо присно благо быти дающа и грешником присно увы подающа. И блаженый Анастасие Синайские горы глаголет: «Осмое племя писание глаголет, еже под седмем настоящаго века, еже хотящаго быти живота и пребывание яже предгласи осмодневная обрезаниа; о осмей премудрый Соломон нас наказует: дай же чясть седмому, та же и осмому, яко же бы рещи: попецися в житии сем о хотящем и пребывающем житии».

Глаголеть же святый Иоанн Лествичник: «Седмь убо седмаго нынешняго века суть деланна; осмое же будущаго века знаменателно есть». Видиши ли, брате[5], яко вси вещают равно и полагают седмь веков нынешних, а не тысящь седмь, а будущий осмой век, а не тысящу осмую глаголют! Премудрый же Максим не нарече его будущий век осмый или тысящу осмую, но осмый день.

Поистине же чюдне нарече его «день», яко тогда уже не будет нощи. Но аще восхощеши[6], и сие тебе от божественых писаний скажем по мале, что есть век и что есть тысяща и чего ради глаголется нынешний век седморичен, будущий же осмый полагают. Ныне же зри пророческаго речениа премудраго Соломона. Рекл же есть Соломон: даждь часть седмым,—сиречь седморичному сему веку, ибо от начяла мира сего седморичное число бог паче всех числ предпочте.

Того ради седморичен век сей именовася: в шесть бо дней составив же и въобразив и украсив всякими виды мира сего сотворив и в седмый день от дел почивает, сиречь в суботу. Субота бо еврейски покой именуется. По суботе же паки начинается первый день, сиречь неделя и доходит паки до седмаго дни, сиречь до суботы и тако обращается седмица от неделнаго дне починается и даже до суботы достизает.

И тако бог повеле всему миру сему в нынешнем веце сими седмимы деньми строитися. Потом же бог Моисею повеле израильтяном заповедати седмый день почитати еже есть суботу и в летех же повеле им седмое лето почитати и не точию се, но и в седмерицах седмиц, сиреч да исчислиши себе седмь лет седмищи и будут ти четыредесять и девять лет и освяти лете пятьдесятное, еже израильтяне нарекоша «овилео», сказаемо «оставление», инии же нарекоша богозванный день.