Страница 81 из 91
МЕСЯЦА ΜΑΙΑ ВЪ 7 ДЕНЬ. ЖИТІЕ ПРЕПОДОБНАГО ОТЦА НАШЕГО НІЛА, СОРСКАГО ЧУДОТВОРЦА, НАЧАЛНИКА И УЧРЕДИТЕЛЯ МОНАШЕСКАГО СКИТСКАГО ЖИТІЯ ВЪ РОССІИ ПО УСТАВУ И ПРЕДАННО СВЯТЫХЪ ОТЕЦЪ
Сію райскую ветвь израсти Великая Россія и, якоже повествуется от некихъ, царствующій градъ Москва того отечество бяше. От кіихъ же родителей рожденъ бе, сего уведети не возмогохомъ; точію сіе несумненно есть, яко — от верныхъ и благочестивыхъ и яко воспи- танъ бе в добромъ наказаніи и страху Божію и истинному христіанину подобающему житію от юности наученъ. Остроуменъ же бяше велми и к чтению книгъ прилеженъ.
Прохождаше же первее, якоже повествуется, должность скорописца. Таже, разсмотревъ мира сего суету и вся оставивъ, пострижеся во обители преподобнаго Кирілла, иже на Белеезере. И живяше богоугодно, проходя вся монастырская послушанія усердно и со всякимъ опаствомъ и вниманіемъ, храня обеты монашескаго жительства. По- стомъ и бденіемъ и различными труды плоть утомляше, молитвою же и вниманіемъ и чтеніемъ Писаній душу, умъ и сердце очищаше. И тако день от дне преуспевая, от силы в силу идяше, степени во своемъ сердце полагая.
Удаляшеся же всячески от миролюбивыхъ и не внимающихъ своему спасенію, зане видяше многихъ, не по Бозе жительствующихъ и в попеченіихъ бесловесныхъ и о притяжаніи паче, нежели о своихъ ду- шахъ, пекущихся и не внимающихъ Божественному Писанию и пре- даніямъ святыхъ отецъ. Сицевыхъ ошаявашеся, внимающимъ же при- лепляшеся и приемляше от таковыхъ ползу.
О семъ самъ о себе изявляя [в Посланіи къ некоему любимому себе брату], написа сице: «Егда живяхъ въ начале во обители, или монас- тыре, всякихъ соплетеній мирскихъ удаляхся и творихъ деланіе по Божественному Писанію». Зело бо храняше опасно святый Писанія и предания древнихъ богодухновенныхъ и святыхъ отецъ и по сих житіе свое поправляше.
Тако ему богоугодно жительствующу во обители преподобнаго Кирілла, пріиде ему желаніе видети и поклонитися сущим на Востоце святымъ местом, идеже Господь нашъ наше спасеніе содела, и посети- ти жилища святыхъ тамо сущихъ отецъ и ползу от нихъ себе пріяти.
Пріимъ убо благословеніе, поиде. И, обшедъ святая места, сущія в Палестине, пріиде и во Святую гору Афонскую, обыде тамо монастыри и уединенная жилища монашескія, такожде и въ скитехъ безмолвст- вующія и уединяющіяся святыя отцы обходя, многую от нихъ пріем- ляше ползу. Ового бо посту и воздержанію чудяшеся, другаго совершенному нестяжанію и нищете ревноваше, инаго же терпеливому подражати тщашеся, инаго же постоянному и мужественному терпе- нію во искушеніихъ удивляшеся и ублажаше. От некихъ же и образу вниманія и умнаго трезвенія, или умные молитвы, научашеся. И сице от всехъ, яко пчела любопремудрая и трудолюбивая, сладки добро- детелей медъ собираше, имже не точію себе, но по возвращеніи во отечествіе свое желающихъ быти подражател'ми добродетелнаго его жития изобилно питаше. Сице убо и в сихъ упражняяся преподобный во странствіи своемъ, навыче добре житію тамо сущихъ святыхъ отецъ, чиноположенію и уставу и различнымъ иноческимъ добродетелемъ.
По доволномъ времени пребыванія своего во Святей горе, такожде и во окрестностехъ Царяграда, вся жилища иноческая обшедши и от всехъ ползу пріимши, во отечествіе свое [яко добрый и искусный купецъ со многимъ прибыткомъ и духовнымъ обогащеніемъ] возвра- тися и, паки по обитель преподобнаго Кирилла пришедъ, сотвори себе келлію вне монастыря и поживе ту некое время въ посте и молитвахъ и во иныхъ постническихъ, иже навыче, подвигахъ. Таже, вожделевъ совершеннейшаго безмолвія и уединеннаго пребыванія, изыде убо и обхождаше пустыню, ища себе угоднаго ко пребыванію места. Таже пріиде на речку, Сора именуемую. Место же оно ниско и блатисто и неудобопроходимо бяше. Ту убо возлюби жити преподобный.
Первее водрузи крестъ на месте томъ и келійцу созда пребыванія ради. Таже ископа кладезь. По семъ уготова место построенія ради церкве, наносивъ своими руками земли, понеже, якоже речеся, место ниско и блатисто бе.
Живяше же ту преподобный первее единъ, токмо со единымъ уче- никомъ своимъ, Иннокентіемъ именемъ, с нимъ в'купе пришедшимъ, иже въ трудехъ ему помогаше. Таже начаше приходити къ нему же- лающіи жител'ствовати при немъ и имети его себе наставника и пастыря и ко спасенію руководителя. Он же первее много отрицаше и не пріемляше, не хотя быти пресецаему безмолвію его и бегая тяготы началства. Ведяше бо святый, колико тяжка есть вещь еже пріяти на себе попеченіе о душахъ и носити имя пастырское, къ сему же и сми- ренномудръ сущи велми, глаголаше себе быти грешна и неразумна.
Но обаче, елико онъ отрицаше, толико они стужаху ему и неотступно прошаху, да будеть имъ пастырь и да пріиметъ ихъ в свое сожитіе.
Разсмотревъ убо блаженный и виде, яко воля Божія есть на сіе, да пріемлетъ истинно спастися желающихъ, начатъ убо приимати приходящих, и предаяше имъ сія, да во всемъ последуютъ преданіямъ святыхъ отецъ и да хранятъ заповеди Божія: отнюдъ не вносити из- ветовъ, глаголюще, яко ныне невозможно жити по Писанію и преданію святыхъ отецъ. «Но аще и немощни есмы, [глаголаше святый,] елика сила есть, должны подобитися и последовати стопамъ святыхъ и при- снопамятныхъ отецъ нашихъ и техъ преданія опасно хранити». Аще ли же бы кто не изволялъ в сихъ храненіи пребыти, таковыхъ отнюдь не приимаше. Жалающихъ же тако жити пріимаше съ любовію.
Написавъ же и Уставъ монашескаго скітскаго жителства по образу и чиноположенію древнихъ великихъ святыхъ отецъ и якоже виде и навыче во Святей горе Афонстей во время своего тамо пребыванія; тако и предаде во своем скіте. Уставъ же бяше сицевый.
Живяху кійждо особь во своей келлій, растояніем другъ от друга яко на верженіе камене, такожде и от церкви. Созда бо блаженный храмъ во имя преподобный <!> Ефрема Сіріна, егоже и житію во всемъ подражаше. Пребывающе же въ келліяхъ своихъ, упражняхуся в молитве и рукоделіи. От труда бо рукъ своихъ питахуся. Аще же недо- ставаше имъ на нужную потребу, то мало и милостыни пріимаху от христолюбцевъ.
Въ субботы же и недели, собирающеся в церковь, службы совер- шаху вкупе и паки по келліямъ расхождахуся. Такожде и егда быва- ше прздникъ Господьскій или Богородичный или некимъ святымъ, в'купе собирающеся въ церковь, службу совершаху и паки, якоже речеся, по келліямъ своимъ расхождахуся.
Аще же и разделно живяху, кійждо бо еже творяше рукоделіе приношаше къ настоятелю, пищу же и одежду от него пріемляху. Не попущашеся же отнудъ кому что творити по своей воли, или исходи- ти камо без благословенія настоятеля. Аще ли же бы кто что сотво- рилъ самочинно по своеволію, таковый изгонимъ бываше от сопре- быванія. Такожде и стяжанія каковаго–любо кому имети отнюдъ не позволяшеся.
Аще кому из братіи случашеся в'пасти в некое прегрешеніе, абіе течаше къ настоятелю, исповедая свое согрешеніе, и от него пріемляше прощеніе. Такожде и помыслы своя исповедаху отцу своему и от него пріемляху исцеленіе, зело бо искусенъ бе преподобный во врачеваніи болезнованій душевныхъ. И даръ разсужденія имеяше болшій паче иныхъ дарованій и нужнейшій, и симъ много ползоваше иже при немъ живущихъ братію и приходящихъ к нему ползы ради.
О самого же преподобнаго отца Нила житиія устроеніи что речемъ? Не бо возможно словомъ изявити и сказати того премногія подвиги. Создавый наедине сердца человековъ Богъ нашъ — Той единъ весть яже творяше пред Нимъ втайне блаженный и готовляше ему многое за сіе воздаяніе. Намъ же зело малая от премногихъ его подвиговъ и изрядныхъ деяній и чудесъ в веденіе пріидоша <над строкой добавлено: простотою оставлена быша без писанія>, или и написана суще, но нераденіемъ и небреженіемъ или инымъ каковымъ образомъ уничтожена быша. Обаче светъ добродетелныхъ его деяній и во тме неве- денія светло светится. Не благоволить бо Господь таковому светил- нику под спудомъ неявленія крыему быти, тако бо рече: «Да просветит- ся светъ вашъ пред человеки, яко да, видяще ваша добрая дела, и прославятъ Отца вашего иже на небесехъ» [Мф. 5, 16]. Малая убо от многихъ, елика уведети возмогохомъ сего богоноснаго и святаго мужа добродетелная деянія написашася. О жестокомъ же его житіи и совершенном нестяжаніи и нищете, еже есть корень и основаніе иночеству, несть нужды много глаголати <над строкой: и писати>. Самое бо место, егоже избра себе ко пребыванію, скорбно и уныло сущо и не удобь проходимо мирскими человеки и незнаемо, ясно свидетель- ствуетъ о семъ.